Chinram ah SAC Ralhrang 165 an Thi i, CDF lei Minung 30 nih Nunnak an Pek ve Cang

April 24 in June 10 tiang ah Chinram chung kahdohnak ah SAC ralhrang 165 an thi cang i, CDF lei zong in minung 30 nih ram le miphun ca ah ralhrang do in nunnak an pek, tiah CDF nih an langhter. SAC ralhrang ruang ah mi sawhsawh a nunnak a liammi minung 9 zong an um.

Kahdohnak ah SAC lei in minung 123 hliamhma an keng i, CDF lei in minung 45 hliam an pu ve. SAC ralhrang hliamhma a pumi milu hi hinakhin an tam deuh kho, tiah CDF nih an chuahmi cazin ah an langhter. Crd-The Chin Journal.

Thawng pang dang relchap; Sopum ah SAC Ralhrang 100 Hrawng an Phan, Khuami Cheuthum-Cheuhnih an Zaam, Nihin zaanlei sml. 3:00 hrawng ah Thanthlang peng, Sopum khua ah SAC ralhrang 100 hrawng an phan i khuami cheuthum-cheuhnih an zaam, tiah thawng kan theih.

Khua upa pakhat nih, “An rak phan lai timi thawngpang kan theih cia i pa upa deuh lawng khua ah an taang. A dang cu an zaam dih. Kan zapi zaam cu kan inn an bauh dih lai ti kan phan caah cheuthum-cheukhat cu khua hngah pah in an taang ko,” tiah The Chin Journal ah a chim.

SAC ralhrang pawl Sopum khua an luh lai ah meithal zun 10 hrawng pehzul in an puah. Khua an luh hnu ah khuachung ah a taangmi khua upa le pastorte cu SAC ralhrang bawi nih a ton hna i biaruahnak a ngeih hna.

Tonnak aa telmi khua upa pakhat nih, “Zeihmanh nan thinphang hlah u a kan ti. Nan sattil pawl zong a herh a si ahcun nanmah nih nan khiahmi a man ning tein kan in cawk ko hna lai an ti. Buaibainak chuahpi awk ah kan ra lo a kan ti. Cun, meithal i ken buin ahohmanh i chok hlah u, ral ah kan i ruah hna lai i kah sual a um kho a kan ti,” tiah a chim.

SAC ralhrang pawl cu Sopum ah tu zaan riah an i tim. Zei tik tiang an caam lai theih a si lo. Sopum cu Thantlang he meng 12 hrawng a hlatnak ah a ummi a si i, ahlan ah a rak ummi SAC ralhrang minung 17 hrawng cu kan hnu thla ah khan Thanthlang lei ah an rak kir. A um ciami pawl an kir hnu ah thazaang tampi in nihin an rak phak tthan hi a si.crd- The Chin Journal.

Rel chap; Sopum ah a Phanmi SAC Ralhrang pawl an Kir Than, Nizaan (June 9) ah Sopum khua ah phanmi SAC ralhrang 100 hrawng cu zaan khat an riah hnu ah an kir tthan, tiah khuami nih an chim.

Nihin zinglei ah an kir tthan hna. An thilri pawl motor in an phorh i Thantlang lei ah an kal. Khoika ngaingai an panh cu kan thei lo,” tiah a cunglei khuami nih a chim.crd-The Chin Journal.

Leave a Comment

Leave a Reply

Your email address will not be published. Required fields are marked *