Chungkhar 5 Inn Inn 5 Hrawk Piak An Si

Nizan September 1, 2020 ni ah Yangon ramthen, Northern District, Taihgyi myone, Sin Sakhan oksu, Kanthayar khua ah ram lak a ummi vui pakhat cu khua chung a lut i khuami inn inn 5 a hrawk piak hna tiah an khuabawipa sin in theih a si.

Cu ram vui hrang cu Kanthayar khua chungah a lut i U Than Kyaing te chungkhar minung 7 umnak inn, U Thaung Shwe te chungkhar 5 umnak inn, U Bo Khin te chungkhar 2 umnak inn, U Pan Maung te chungkhar 5 umnak inn, le U Lu Taung Tan te chungkhar 14 umnak inn hna a hrawkpiak hi a si.

Inn a hrawk lawng siloin an inn chungah a ummi facang zog a ei piak chih hna caah an sunghmi hi phaisa in tuak ahcun inn khat ah Kyat 50,000 hrawng siseh law a za tein Kyat sing 2 man hrawng an sung tiah theih a si.

Vui hrang nih an inn a hrawkpiakmi chungkhar hna cu dum rian le zuat khal rian tuan in aa cawmmi an si i vui hrang a lut ahhin an chungkhar in an tli caah  minung le saram tu cu a hlaimmi a um hraw lo tiah theih a si.

Chungkhar 5 inn a hrawkpiak tu vui hrang cu an khua i zauk bawi, sawmuk bawi le khuami nih an dawi i zantim suimilam 3 am hrawngah khua chung in an dawi kho tiah theih a si.

“Khua chungah vui hrang a lut i inn ngeitu hna an zam. Zan khuadei kan it cio lo. Facang zong a ei piak hna. Inn cheukhat cu a hrawk piak hna. Vui hrang hi hmasa zong a lut tawnmi hna bantuk a si lo, a ngan khun. A hngawngah hngawng awih aa tel. Ram vui hrang hi cu ka i ralring pengmi a si” tiah Sin Sakhan khuabawi U Khin Nyo nih a chim.

Ref: TPMG