Vawlei cung tihnungbik rian ahhin ah body guard rian aa tel ve. Cucu Cherry Htet zong nih a tuan ve. Cherry Htet cu DASSK body guard a si i DASSK he naihniam bik in khuasa pengmi a si. Cherry Htet hi ral i khamnak ahcun 99% a tling an timi nusaltha a si. DASSK pawng te ah a um peng caah mipi nih theihmi le thangthat a comi asi.
Nai hrawng cu Thanithari Region Chief Minister Daw Lei Lei Maw kong ah Cherry Htet soisel a tong pah caah thinlung cu a nuam lo. Cucu Daw Lei Lei Maw nih vanlawng cung tiang kai in DASSK a don caah a si. Cunglei bawi pakhatkhat khualtlawn caan ah zeibantuk zeibantuk CM hmanh nih vanlawng cung tiang kai in an don ti theih si bal lo.
Tutan Daw Lei Lei Maw nih DASSK a don ning hi a sualnak maihmilhpiak (ngaihthiam) a duh caah vanlawng cung tiang va don sehlaw aa dawh. CM or MP pakhatkhat nih duh paoh in vanlawng cung tiang duh paoh tum kai hi DASSK security caah phungbuar pakhat zong a si. Cucu Cherry Htet nih a rem lo caah Daw Lei Lei Maw nam sehlaw a dawh.
Cherry Htet nih Daw Lei Lei Maw hi a chuih hmanh chuih sehlaw Cherry Htet a mawh ti awk a tha hnga lo. Zeiruang ti ahcun Cherry Htet nih DASSK cung i a ngeihmi tuanvo le a dawtnak hmuh khawh a si. DASSK khual tlawnnak kip ah amah Cherry Htet tluk in a lung re a theimi ahohmanh an um lai lo. Mipi nih DASSK a dam lo sual lai tiah kan phangmi nakin Cherry Htet a phang deuh rih lai.
Zeiruang ti ahcun DASSK khual tlawnnak kip ah Cherry Htet nih a zohkhenh ning zohnak in theih asi. Zoh dawhnak men in a zohkhenhmi a si maw tiah tha tein zoh than tikah DASSK cungah a thinlung tak in a dawt ko timi hmuh khawh a si.
DASSK nilin lak a um caanah a takpum in thladem a tuah piak, acaan ah nithong a chinh piak. DASSK thutdan a tlu sual lai a ti i a pum tein a donh piak. Donhhlei cung a tum kai paoh ah DASSK a tlu sual lai a ti i a mit he a thenter lo in a kut tein a hruaimi pawl le ti le mei kong zongah DASSK nih hal hau loin a pawng tein timhcia in a chiahpiak dih hna. Cu vialte zohnak in Cherry Htet cu Body Guard asinak lawng siloin DASSK a dawt hrimhrim timi a langhter.
Ref: Padethar
Leave a Reply