CNA, CDF-Matupi, CDF-Paletwa Le SAC Ralkap Kahdohnak Ah SAC 10 An Thi

CNA, CDF-Matupi le CDF-Paletwa nih Paletwa lei in a rak zaam mi SAC ralkap pawl cu ni hnih chung an kah hna i, SAC ralkap 10 an thi, tiah CDF-Matupi nih thawng an chuah. Paletwa peng in a zaam mi SAC ralkap pawl cu January 20 ah khan CNA, CDF-Paletwa le CDF-Matupi nih Paletwa le Sami karlak ah an kah hna i, SAC ralkap pathum a thih pin ah a dang panga hrawng hliamhma an pu, tiah an langhter. January 21 zinglei ah Santat khua ah i kahnak a chuak ṭhan i, SAC ralkap lei in minung pasarih hrawng thi.

CNA, CDF-Paletwa le CDF-Matupi lei aa hliam mi le a thi mi kan um lo, tiah CDF-Matupi nih a langhter. SAC ralkap nih Santat khua sizung an hrawh i, sii-ai le motorcycle pawl zong mei in an khangh hna. Cun, kiangkap ah ral a zaam mi nu panga le pa pathum cu SAC ralkap nih January 22 ah an tlaih hna. Tlaih a tongmi pawl hi an thlah ṭhan dih hna nain pa pathum tu hi atu tiang khua an phan rih lo, tiah an langhter. CDF-Daai zong CNA, CDF-Paletwa le CDF-Matupi bawmh ding in an rak phan ve i, pehzul in SAC ralkap kan do lai, tiah CDF-Matupi nih thawngthanhnak an tuah.

Thawng dang relchap- MNDAA Sinah Hriamnam A Chia Mi Brigadier General 3 Cu SAC Ralhrang Nih Thih Dan An Pek Hna, Shan ramkulh chaklei, Laukkai peng ah Myanmar National Democratic Alliance Army(MNDAA) sinah hriamnam a chia mi Brigadier General Tun Tun Myint, Moe Kyaw Thu le Zaw Myo Win cu SAC ralhrang biacheihzung nih thih dan an pek hna, tiah Naypyidaw SAC thawng laaknak hrampi nih a chim.

2024, January 13 ah SAC ralhrang Yiah-mah-khah in an lu bik Brigadier General Kyaw Kyaw Tun hruainak in biaceihzung nih suimilam 48 cung hlathlainak an tuah hnu ah atu bantuk in thih dan an peh hna hi a si. 1959 ralkap Upadi Section 32(A) nih venhim ding in ṭuanvo an ngeih mi khuapi hngahnak sakhan, Gate, rianṭuannak hmun, ralhrang tilawng le ralhruang a zaamtak mi paoh cu an i tlak ning in dantat an si lai i thih dan zong pek khawh a si nakkong a lanbghter.

January 4 ah Laukkai hmunram um SAC ralhrang le an chungkhar 4,000 leng nih MNDAA sinah hriamnam an chiah ruang ah ṭuanvo ngeitu bik simi Laukkai hmunhram ukhruainak phu ah Chairman Brigadier General Tun Tun Myint le Brigadier General Moe Kyaw Thu, Brigadier General Zaw Myo Win hna cu rampi leirawitu le nawlpeknak ngai lo mi telh in ralkap Upadi Section phun tampi ning in thih dah an pek hna hi a si.

Cu pinah Sah-kah-kah 16 in Division Commander Thaw Zin Oo, Sah-kah-kah 12 in ralhrang bawizik Aung Zaw Lin le Sah-kah-kah 14 in ralhrang bawizik Aye Min Oo hna zong kum thih hlan lo thong thlak dingin bia an ceihpiak hna i, Laukkai hmunram um Colonel rank a si mi ralhrang 6 zong kum 20 thong thlak ding in bia an ceihpiak hna, tiah theih a si.

Leave a Comment

Leave a Reply

Your email address will not be published. Required fields are marked *