CNA Nih A Molh Cangmi Kawl Ralkap He I Kah An I Sum Le Ka Thangthat Ngaingai Hna

Lai ralkap (CNA) nih a molh cangmi Kawl ralkap he i kah an i sum le ka thangthat ngaingai hna. Hika ah ‘Lai’ hi ‘Chin’ he aa khat in ka hman. Hitihin a lamkip in cuanh khawh a si. Pakhatnak. I Kap Hna Sehlaw Ahodah A Tuar Bik A Si Lai?: Rammi, Tio kap ah a ummi rammi vialte nih kan tuar lai. Zeidah a rawk lai? 2012 Kahdaihnak. Kawl ralkap nih ‘tapung’ cazin ah a thar in a khumh hna lai le Tio kap khuate cu, tapung khuate tiah hun ti kan si lai.

Kan thih ah, thil duhnung lo bik thlanglamhnak kan ton tik ah, tuanvo na la kho lai maw? Na lak khawh lai ka zum lo. Pahnihnak. Kawl ralkap kut kan tuar tikah, ahodah a lung a fak lai? Miphun a dawtu Laimi vialte an lung a fak lai. Cu tik ah, CNA nih atu nak let in soisel an ton khawh. Pathumnak. Lai Ralkap Cu ‘Hnawmtinphor’ An Si: Kawl ralkap he an i kap lo le ‘an ralchia’ tiah heh tiah kan soisel hna.

I kap hna sehlaw, rammi nih har an hun tuar tikah, a let in kan soisel hoi hna lai. I kah zong a ngah loh, i kah lo zong a ngah loh. Cucaah kan hnawmtinphor an si. Palinak.  Lai Ralkap Cu An Der Tuk. Aw si, an der tuk. Lai ralkapbu ah kan luh huam ttung lo. An caah chaw le va a tho lo kan tampi ko lai tiah ka ruahdamh. Kan thawh lonak a ruang cu a um sawk lai nain kan thawh lo hleihlei ah, va soisel kan i manh tuk hi, kan ding lo e, kan mak lo e.

Panganak. Lai Ralkap An Derthawm Bak Ruangah Mithawng le Mifim Nih Nan Dirpi Ding Hna A Si Cu: A molh cangmi Kawl ralkapbu thawnning khi a der deuhmi va teinak le va thlanglamhnak ah an hman. Cucu, mitthalo hlir le mithat lainawng lungput hlir le tuahsernak a si. Cucaah, anmah bantuk mithalo nih dah ti lo, a vawleicung pumpi in an tthawnnakpi cu, an mawhchiat.

U.S. tehna, Europe ram tehna, Canada tehna, Australia tehna le a dangdang nih cun, a derthawmmi le namnehmi vawleicung miphun an dirkamh hna, an ttanpi hna. Cucu, fim dik le tthawn dik dekmak cu a si. Cu bantukte cun, kan tthawn dekmak ko le kan fim dildel ko ah cun, a molh cangmi Kawl ralkap nih nizan nai Lai ralkap le Laimi cung i an tuahmi zoh hin, a derthawm kan ti lengmangmi Lai ralkap dirkamh chin lengmang le ttanpi chin lengmang ding a si ko teh.

Ka Kawipa nih, “Chinmi kan derthawm” bia a si a ti le ka lung a tling ve. Kan nupile nih, “Na hawi pasal dang cu, nan kan ti sual ahcun, kan i faksak tuk ah van ah kan zuang deng”. A derthawm cia sin ah, “Na derthawm ning” va ti lengmang khi mifim le mithawng le mirum dotla nih an hmanmi zia a si lonak kha U.S., te pawl kong lak in ka tial cang ko khah.

Ahohmanh, bu zeihmanh, hnawmtinphor dirhmun i kan chiah hna tik ah, a chiatu minung kha a ding lomi a si. Atutan Kawl ralkap nih Lai ralkap le Laimi an kan thlanghlamhnak duh lo ah pumpak nakin a tthawng deuhmi Lai ralkap kan dirpi caan a phan. CNA thawng chin lengmang ko she. Crd- Salai B chankhar