02.10.2020: “Nal profet kha iralring u, nan sin an rat ahcun tuu bantukin an i umter, sihmanhsehlaw an chunglei cu cenghngia hrang an si. Annih cu an theitlai khan nan rak hngalh ko hna lai. Khohmung nih mitsur thei a tlai bal lo i saihmur hling nih theipi a tlai bal lo,” tiah Matthai 7:15 ah kan hmuh. Nal profet timi hi (false prophet/teacher) a si i profet deu ti khawh zong a si. Lai Baibal ah cun nal a hmang i a țha ngai ve.
A hman lomi cawnpiaknak a si lomi cawnpiaknak hi False teaching ti a si. Hi bantuk a si lomi le a hman lomi cawnpiaktu hi Nal profet/false teacher ti a si. Tukum 2020 thimnak ding caah party tampi lakah kannih CNLD Hruaitu pawl dirhmun kan zoh tikah hi Biafang ah an tla ve ko lo maw tiah ka hmuh.
A cunglei langhter cangmi ah khan khohmung nih mitsur thei a tlai bal lo i saihmurhling nih theipi a tlai bal lo a timi bia hi nihin CNLD Hruatu le Candidate pawl cawnpiaknak he pumkhat bak a si.
Me an kawlnak ah, (1) Federal democracy hmuh dingah CNLD hi Me pek ko u, (2) Covo lak dingah CNLD hi Me pek ko u, (3) Democracy federal hmuh dingah CNLD hi Me pek ko u. Center ah NLD nih cozah a tlaih lai i Chin state ah CNLD nih cozah a tlaih ding a si caah CNLD hi Me pek ko u tiah lemnak le hlennak bia phunphun an chim.
Hi Federal democracy, Covo, Democracy federal, State cozah timi biafang vialte hi Democracy ram ah an hmanmi biafang pawl an si. Anashin (Dictator) ram ah hmanmi biafang an si lo. Kawlram hi democracy ram, mipi nawlngeihnak ram a si lo, ralkap nawlngeihnak ram a si rih. Hi ralkap nawlngeihnak kan donghter hlan chung cu democracy ram kan si rih lo timi hngalh cio ding a si. Atu hi democracy lei lut dingah kan thawk kate a si.
2008 phunghrampi hi ralkap uknak cauk cu a si. Hi phunghrampi ruangah mipi nih a duh ningin Kawlram hi a hruai kho lo, ralkap nih hruainak nawl a pekmi chungte lawnglawng uk khawh le tuanvo lak khawh a si. Atu CNLD Hruaitu le candidate pawl dirpimi policy le slogan vialte hi 2008 phunghrampi cauk chungah a um lomi lawngte an si. Hi phunghrampi ah a tel lomi kongkau caah Hluttaw lengin (hluttaw-pinpa) ceihnak um seh an ti nain ralkap nawlpek lo hnu cun zeihmanh a si hlei lo.
Union Peace Conference hi tangka dihnak menmen a si. Ralkap lungthin ah umharphen in thuti, eiti, dingti, ruahti sawhsawh a si ko. 2008 phunghrampi tangah kan um dih, zeibantuk thil kan duh zongah phunghrampi chungah a um lomi biafang pohpoh chim a ngah lomi lawng a si. CNLD nih miphun min in a dirpimi ‘Federal democracy’ zong ngahnak sullam a um lo.
Covo lak khawhnak zong a um lo, Center ah NLD nih cozah a tlaih lai I State ah CNLD nih cozah tlaihnak lam zong a um lo. 2008 phunghrampi chungah a tel lomi biafang (thil) hmuh khawhnak lam a um lomi kan hmuh lai, kan lak lai, kan tlaih lai timi hi ‘Nal profet/false teacher/false speaker’ an sinak a lang tuk. Khohmung nih mitsur thei a tlai bal lo bantukin 2008 phunghrampi tangin Covo thei zong a tlai lai lo.
Federal thei zong a tlai lai lo, Miphun party nih miphun cozah tlaihnak thei zong a tlai lai lo. A si kho lomi thil kan siter lai, a um lomi thil kan umter lai timi cawnpiaknak ruangah minung tampi kalsualter ding hi tihnung taktak a si. Politics cu teinank hmuh duh ahcun Lih khawh, Hlen khawh a si ko. Mipi nih zumh awktlak a si maw, nal bia a si maw, theipar tha a tlai lai maw tiah tha tein khuaruat ding a si.
Duhmi hmuh khawh le covo lak khawh dingah 2008 phunghrampi thar a ser khotu silole remh khotu NLD hi tanh rih, a herhmi vialte a ser khawh, a tuah khawh hnu cun mah le duhmi miphun covo kan timi zong aupi khawh a si lai. Phunghrampi thar ngei hlan chung cu NLD hi dirkam rih a herh ko. Cucaah tukum thimfung ‘Me’ hi sullam ngei lomi hmun ah kan thlak sual lo nakhnga ralring buin pek khawh izuam cio usih.
Credit: Laiki Chozah
Leave a Reply