Tinhmi (goal) pakhat ah kal duh ahcun a fiangmi lam a um lawnglawng ah phan kho a si. A fiangmi lam um tung lo ahcun tinhmi hmun phan khawh a si lo timi theih a herh. Atu CNLD nih Chin miphun covo lakthan ding an tinhmi hi zeibantuk lam in dah cu tinhmi an phan lai timi an lam a fiang lo. A fiangmi lam a um lo ahcun tinhmi hmun phan khawh a si hrimhrim lo. (Atang hmanthlak hi zoh chih ding).
1nak. CNLD nih tuah timhmi point 10 chung i a hnubik point 10nak ah mah tein khua khang lairelnak, Federal Union sernak ti bantuk a biapimi aa tel. Hi point 10nak an tuah hmasa khawh lawnglawng ah a cunglei point 9 zong an tuah khawh ding khi a si. CNLD caah point 10nak tlinh ding in a fiangmi lam a um lo. A biapibik tinhmi point 10nak caah lam a um hrimhrim lo. Hi point 10nak zong hi keimah ka tinhmi nganbik a si ve. Hi tinhmi phaknak caah CNLD caah lam a um lo i zeitin an phan khawh lai timi theihter kan duh hna.
2nak. Abiapibikmi tinhmi point 10nak phak khawh ding ah a dang tlangcungmi he kan izuam tti lai timi timhtuahnak cu a fiang lomi lam tluang (dir hmun) a si. Zeicatiah Kum 60 leng tlangcungmi dihlak nih hriamnam an tlai, an i fonh i an izuam cang nain nihin tiang an hlawhtling kho lo. Kachin nih a doh lio ah Karen nih ralkap a ttanpi. Shan nih a doh lio ah Karen le Kachin cu ralkap he hmuh thiamnak an ngei. Hi ti hin kum 60 leng a liam caang i an hlawh tling kho ti lo.
Cucu a fiang lomi lam hlun pakhat a si. Atu zong hmasa bantukin tlangcungmi party lak ah a cheu cu ralkap he theihthiamnak an ngei i a cheu tlangcungmi cu an ngei ve lo. Cu bantukin kum caan saupi tinhmi hmun a phanpi khawh tung lomi lam an thim than a si. Tinhmi point 10nak tlinter dingah mah nih ngeihmi lam pakhat hmanh um loin Chin miphun covo kan la than lai timi cu CNLD nih zeitindah a lak than khawh lai timi theih ka duh ko.
3nak. NLD party nih Democracy Federal Union kan serh lai, ralkap cu mipi cozah kuttangah kan umter than lai i remkhel chung in an chuak lai, Democracy phung he aa tlakmi phunghrampi kan ser lai, 2008 phunghrampi kan remh lai tibantuk in a fiangmi lam an thim ko. Cu hmanh ah nan theih bang in hi dirhmun tiang lawng an phan rih. A fiang lomi lam um tung loin Chin miphun covo kan lak than lai a titu CNLD nih zeibantuk in dah Chin miphun covo an lak than khawh lai timi theih ka duh ko.
A cunglei i ka tialmi kong he pehtlaih in CNLD party Candidates pawl ni fianternak ka tuah kho uh law ka duh ko. Ka hawile lakah CNLD Candidate 4 nan i tel i ka let ko uh. A fiangmi lam um tung loin Chin miphun covo kan lak than lai tiah zeihmanh a thei lomi Chin mipi pawl hleng ti hna hlah uh tiah zaangfah kan nawl hna. Thang Khai.
Note: Aa tlak ning let chawmmi a si.
Leave a Reply