By; Salai Z T Lian: Biden nih electoral vote in siseh, popular vote in siseh Pu Trump cu a tei cuahmah cang. Biden cu 46nak US president si dingin a fian cang ti khawh asi. Tazacuainak le mee rel thannak nih zeipipa a thlen kho lai lo. Mee fiar le lih a um tiin a sungtu lei nih an au leng nain tha tein tehte an piah kho lo.
USA ah mee fiar le hrokhrolh ahcun kum 5 nak tam lo thawng thlak khawhmi asi caah aho nih dah mah mee kongah kum 5 thawng a thlak duh hnga? An um hmanh ah minung tlawmte an si lai tiin ka ruah. Nain tutan ithimnak ah mee fiar le lih nih ithimnak a phi a thlen kho lai lo.
Fawi le bai in Donald Trump nih ” Ka sung cang ko, Biden teinak na hmuh caah kan lawmhpi ” tiin bia a chim lai lo. Donald Trump bantukin a tanghtu pawl zeimawzat cu kan sung cang ko tiin A-Key in G key lei ah an auaan an thumh ko lai nain cheukhat cu ” Ka dai lai lo, dai nai sai hlah” timi hla cu A-key in an sak rih ko lai. A poi maw? A poi lo. An mah covo le nawl a si ve ko.
Donald Trump nih innrangpi in a chuah duh sual lo ahcun amah le amah a mual a phoh ah a cang kho caah duhsah tete in a sunghnak kong cu A-key in D-key lei ah a tum thluahmah ve te ko lai. Sungh hi aho ca hmanh ah a fawi lai lo, abikin President term khat lawng a tuanmi hi minung 4 lawng an si rih.
Donald Trump telh ahcun minung 5 an si cang lai. One term President timi hi Donald Trump nih a fahsak khawh ngaimi hmape a si kho ve. A zeiti asi zongah Donald Trump cu tuanbia ah a tang cang lai. Biden tu cu tuanbia a tial thawk cang lai. Congratulations, Biden! Mangtha, Donald Trump.
Leave a Reply