Covid ruangah hi vialte mi nunnak a liam ruah ahcun ngaihchia a si ko. Jesuh nih nunnak cu keimah hi ka si timi hi ruah lo awk a tha lo. Thlarau zungzal nunnak ngah loin a liam mi zong an um len lai. Pathian nih a rak ser hmasa mi Adam le Eve cu thi thiam lo dingin, zungzal nung dingin a rak timh piak hna.
Cucaah Eden dum ah “Nunnak thingkung” cu a khohter. An hmu sual lai lo ti phan ah dum laifang bak ah a khohter. Nain chiatha hngalh khawhnak thingkung theitlai tu kha ei an i thim caah Pathian timh piakmi (plan) a rawk. Eden dum in thawl an si.
Thawl an si hlan i Pathian nih a pek mi hna sunparnak, thawnnak le fimnak zong an ngei ti lo. Eden dum innkaa khar a si cang. Anmah tein luh than lam an ngei ti lo. Minung duh thim palh ruangah thatnak ai ah aa rolh cangmi chiatsernak vialte hloh awk ah le thlarau zungzal nunnak kan co khawhnak ding caah a fapa Jesuh nih kanmah ai ah a nunnak a pek.
Cu a nunnak a pek mi a cohlang mi caah aa khar cangmi Eden dum innka cu awn piak a si i luh thannak lam a kan ser piak than. Cu rian cu Jesuh thihnak a thawhter tu Krih Thlarau nih zumtu mi hna nunnak chungin rian a tuan. Hi rian hi Baibal nih tlanhnak (Redemption) rian a timi kha a si.
Khamhnak (Salvation) rian cu vailam cungah Jesuh nih a lim cang. Tlanhnak rian cu a dong lo. Eden dum in thawl cangmi mi caah Jesuh nih a nunnak Amah PUM hrim a pek i thihnak in thawhter a si hnu ahcun Amah PUM si ti loin Khrih nih a ngeih mi (quality) fimnak, thazang, thawnnak le sunparnak tu kha pek kan si cang.
Phun dang in chim ahcun Eden dum in thawl an si hlan Pathian nih a pek mi hna fimnak, sunparnak le nawl ngeihnak vialte, thawl an si tikah an sunghmi vialte kha Khrih hmang in a kan pek than cang.
Khrih kan ngeih ahcun, Khrih kha kan nunnak chungin kan cohlan i hmunhma kan pek ahcun Khrih nih a ngeihmi vialte kha a kan hrawmh i kan ngei dih ve. Paul nih Khrih thawngin zeizong vialte te ka ti khawh a timi cu hi ruangah pei a si cu.
Zeitindah a chim rih? Khrih chung i nan nunnak ah khan i lawm zungzal ko u a ti. Zumtu caah Pathian nih hmun sang bik i a kan chiahnak cu Khrih chung (In Christ) hi nun hi a si. A ngaite ti ahcun zumtu si hnu ah ka zumh ahcun timi nakin Khrih chungah ka nung maw timi biahalnak hi a bia pi deuh.
Credit: Dr. Pari
Note: Tlangtar ka palh kho.
Leave a Reply