Myanmar rampi thimnak caan a nai, covid 19 pulrai zawtnak ruangah hruaitu pawl zong an duh ning in khual an tlawn kho lo i online deuh an a hmang. Tu tanzong NLD Chairman DASSK nih Chin ramkulh NLD party nih teinak an hmuhnak hnga palai i a hmangmi Isaac Khen cu online in biaruahnak a ngei i a tanglei bantukin a chim.
DASSK nih “Chin ram le Chin mi umnak hmun ka kal caan ah hmuh tonmi ka ngei i Chin mipi hna cu mitha tuk nan si. Kan tlawn caan ah mikhual don nan thiam tuk i laksawng pek zong ah nan nunphun ah aa telmi an ngeihchun tiang mi a pemi nan si. Ka philh khawh lomi pakhat a um. Ka khual lam ah Chinmi pawl ka tong hna i pakhat nih arpi laksawng a ka pek. Arpi pi cu khuallam um ka si caah a si kho lo i ka theihpiak thiam ko tiah ka nawl. Arti tibantuk cu ka cohlan caan a um nain ka khualtlawnnak paoh ah arpi keng chih ding cu a si kho lo caah ka theihpiaak thiam ko tiah ka nawl.”
“Kan ngakchiat lio in Chinmi pawl cu mitha ngai nan si tiah kan theih cang. Ka pa sinah Chinmi nih Chin puan an rak pekmi a um i nihin tiang kan chiah rih. Atu cu a rawk sual lai tiah kaa hruk siang lo i tha tein kan fim. Chin mi pawl cu mitha tuk nan si caah Kawl ee Chin ee tiin a um ding kan si lo. Keimah zong nih cu bantuk ruahnak ka ngei lo. Chin cu Kawl rah ser kaa timh lo i Kawl zong Chin ah ser kaa timh hlei lo. An sinak ning tein duh an nung veve ko. Chin puan cu Chin puan tiah ka kawh tikah aa dannak te ka theih i Chin puan kha Kawl puan ah thleng kaa tim lo.”
“Tlangcungmi vialte anmah le an sining tein duhnungmi nunphung dawh ngei cia nan si i cu nunphun tlau lo ding in kilven a herh. Khat le khat ithentheknak lam nan kawl ahcun cucu tlangcungmi sinak tlautertu ding a si kho. Cucaah tuanbia a um bang in kan tuanti tikah kan rak hlawhtling i cucu Chin mipi nih theihthiam hna seh ti ka duh. Pinlung i Chin hruaitu pawl zong kha philh lo ding ka duh.”
“Myanmar ram chung i Chinmi lawng siloin vawlei cung huap in Chinmi tiang vote pek khawh ding a tuahtu cu Democracy chan ah a si. Cu bantuk pawl zong philh hna hlah she tiah chimh kan duh. Hi tin ka chimhnak ruang cu NLD vote pek hna seh ti ka duh ruangah a si ko. Zeiruangah party dang vote pek loin NLD vote pek ding in ka duhpi ti ahcun nan duhmi party kha zalon tein vote pek khawh a si ko. Asinain kannih zong nih NLD party kan si bantukin NLD party vote an pek ding in kan sawm ding le kan au ding cu kan rian a si ve. NLD vote pe uh ka tinak ruang cu kan duhmi, a dikmi Democracy taktak ser ka duh caah a si.”
“Atu ah Democracy cu hram awt ka lawng a si rih i phunghrampi le Democracy dik kal dan he cun a kaih ngaingai rih lo. Tuah ding tampi a um rih i dih lawlaw ka duh. NLD mipi dihlak zong nih kan rian dih tiang in tuanti ding in kan sawm duh hna. Party dang aa zuam lemmangmi si loin a dikmi Democracy caah aa zuammi tu kan si” tiah a chim.
Ref: Vapual Auaw
Leave a Reply