Dr. Ngun Cung Lian Nih A Soisel Ngaimi NLD Nih Phunghrampi Pohma 261 Remh An Duh  Lonak Ruang Cu A Fiang Tak Tak

Kan hnu Salai Al Bik Lian nih Dr. Andrew Ngun Cung Lian cu 2020 election kong  online  in Talkshow a tuah. Cu ahcun Salai Al Bik  Lian nih hi hnu in DASSK hi riantuan kho hlah sehlaw NLD pawl  in zeitin an si lai na ruah tiah biahalnak a tuah.

Cu biahalnak cu Dr.  Ngun Cung Lian nih tampi in a let i cu bialehnak ah cun NLD Chairman DASSK nih 2008 Phunghrampi pohma 261 zong a remh duh lonak kongg cu atanglei bantukin a chim chih. A chimmi cu;

“2008 phunghram khi remh a duh lo. Zeidah a duh ti ahcun 59 (sah-lung) le 436 remh ding lawng a duh. 261 hi zeihmanh ah a rel lo. Cucu 2013 in nihin tiang ka theihmi a si. President si a duh. Atu ah President nakin sinak sang deuh a ngei ko nain zeihmanh a chuahpi hlei lo. Asi ko lo maw? 436 (A le B) remh a duh. Zeiruangah ti cu ka thei lo.”

“Kan hnulei thla 9 chung bak anmah NLD nih phunghrampi kan remh lai an ti i zeidah an remh na thei maw? Pali an remhmi hna lakah zeidah a si ti ahcun “Ma-tan-ma-suan” timi kha “Ma-tan-suan” timi khi “Ma” timi biafang pakhat te lawng an hnawh. Phaisa ting zeizat dah an dih. Million bak in phaisa an dih” tiah  biatak tein a soisel hna.

2008  Phunghrampi 261 cu Ramkulh vuancichoh thimnak kong a si i Dr. Ro Dinga nih a tanglei bantukin zeihmanh lung awtawm ding um loin fiang ngai in  a tial. A tialmi cu;

“2008 Phunghrampi 261 mah tein ramkulh vuancichoh ithimnak zawn lawng kan remh ahcun tahchunhnak ah Chin State ah ramkulh thutdan 24 chung ah ralkap thutdan 6 a um cia. Cu tikah USDP nih thutdan 7 an hmuh paoh ahcun Vuancichoh an ithim khawh peng.”

“Anmah kha Vuancichoh an si peng lai. Party dang nih cun thutdan 13 hrimhrim an hmuh a hau hnga. Cu hmuh peng cu a fawi lo i ralkap caah chance a ttha peng. Cucaah 261 lawng remh loin a zate in remh a herhnak a si” tiah a tial hi a si.

A chim duhnak cu USDP  nih thutdan 6 an  ngeih cia cang caah thutdan 7 hmuh chap cu an caah a fawi tuk cang i, anmah duhmi vuancichoh thimnak caan tha an ngeih peng lai caah NLD nih hi pohma a remh duhlonak a si ti a si ko. Hi pohma 261 hi USDP nih cun remh an duh ngaimi  a si.

Ref: Religious and Political Voices; Dr. Ro Dinga