NLD party nih Chin miphun minthang Dr. pawl le minthang deuhdeuh pawl hmang in fawi tein Chin mipi me lak khawh an izuammi hmuh khawh a si. A pakhatnak ah Dr. Aung Htang kong kan zoh lai.
Dr. Aung Htang cu Japan ram in haa lei siibawi degree a lami a si tiah theih a si. Atu hi NLD party Chairman Daw Aung San Suu Kyi caah haa lei zohkhenhnak rian a tuan cuahmah lio a si.
Dr. Aung Htang cu a chuahkehnak Matupi myone chungah NLD nih teinak a hmuh khawhnak hnga an hmang cuahmahmi zong a si i ramkhel kong a thei lomi mipi nih amah pumpak fimthiamnak ruangah zumh sual a fawite nain ramkhel kong a theimi Matupi mino hna nih cun biatak tein an soisel ve ti a si.
Dr. Aungg Htang cu Doctor degree a ngahmi pakhat a si nain mipi a lemsawi hna nakah Federal kong pakhat hmanh a thei lomi a si i amah minthatnak caah NLD caah mipi thinlung laknak a tuahmi hmuh a si.
Matupi mino pawl nih NLD le Daw Aung San Suu Kyi an soiselnak bik cu 2003 lio Daw Aung San Suu Kyi Matupi a rat lio ah security lak piaknak ah hruaitu a simi an tlaih i an thahmi University student Salai Hla Moe kongah zeihmanh a tuahmi a um lo.
Salai Hla Moe cu Depaeyin buainak dih in a umnak inn ah Matupi palik pawl nih an tlaih i Kawlram Minchan thonginn chungah ahohmanh theih loin an thah. Nain nihin tiang State Counselor Daw Aung San Suu Kyi nih a philh i NLD cozah tlaih chungah Salai Hla Moe chungkhar le Matupi khuapi caah zeihmanh a tuahpiak hna lo pinah tuahpiak ding timhtuahnak zong a ngei lo.
Cucaah Daw Aung San Suu Kyi caah a nunnak a petu Matupi khuami Salai Hla Moe a philhtu NLD le Daw Suu cozah cu Matupi caah zeihmanh bochan awk an tlak lo tiah an soisel hi a si.
Dr. Aye Aye Ngun: Dr. Aye Aye Ngun hi fimcawnnak lei ah Dr. degree a ngahtu pakhat a si i Hakha le Kalay University ah sianguk tuanvo riantuantu zong a si bal. Hakha nih University sianginn a ngah hnu tlawmpal ah University Professor riantuannak in aa din i NLD Kawl party ah a lut. 2020 election ah Hakha in Amyotha Hluttaw MP cuh aa timh ve hi a si.
Amyothar Hluttaw palai nih hin myone pakhat ca lawng aiawh loin Chin miphun dihlak aiawh in Hluttaw ah chim reltu ding a si. Nain Onlinne interview an tuahmi tete zoh tikah Federal kong zeihmanh aa fiang lomi hmuh khawh a si. Amah nih cun Hakha University thanchonak hal duh ah thimhnak a lutnak kong a chimmi hmuh khawh a si.
Cucaah ramkhel kong a thei lomi mahca lawng aa ruatmi Chin minthang mifim hna kha Chin mipi nih kan iralrin awk a si. Dr. Degree a ngahmi an si ruangah kan tihzah i kan zumh sual ahcun Chin ram le Chin miphun khur chungah namthlak lo ding a biapi tuk. Miphun caah ramkhel rian timi cu miphun a dawmi lawng nih an theih khawh.
Nihin Chin mino nih kan bochan ngaimi Dr. Sa Sa zong NLD Kawl party ah a lut cang timi bia chawkvai a um caah lung a tha hrim lo. Zeicatiah Dr. Sa Sa cu NLD lei in ramkhel chung a lut ahcun mifim mithiam pakhat a si nain NLD Kawl hruaitu pawl nih an fial ning tein cawlcang ding a si lai i zeitikhmanah ah NLD lutlai hruaitu ah aa tel kho lai lo caah a si.
Cucaah fimthiamnak le cawn sannak a ngeimi Chin miphun hna nih nangmah le nangmah Chin miphun hruai kho ding aa zumhmi na si ahcun NLD Kawl party chung lut loin Chin party pakhatkhat ah lut ko tiah zaangfah kan nawl hna.
Note: Kawlca in an tialmi kha aa tlak ning in let chinmi a si.
Source: Chin State and Chin Hero (fb page)
Leave a Reply