Dr. Sa Sa Cu NLD Party Caah Chin Mipi Thinlung Latu Campaigner Ah An  Hmang Ve Cang

Nai ah Chin State and Chin Hero (Kawlca a sullam in) facebook page nih NLD pawl nih Chin ram ah teinak an hmuhnak hnga Doctors pawl pipi le minthang pawl an hman hna tiah Kawl ca in a tial i Laica in ka van leh chin cang.

Cu facebook page nih a tlangtarmi cu “Dr. Sa Sa cu Kawl party NLD ah a lut timi bia chawkvia a chuak” tiah a tial i a tangbik ah Dr. Sa Sa cu Chin party pakhatkhat ah lut ding in a forhfial. Cu facebook page nih NLD hmangmi Dr. Sa Sa telh in Doctor pawl min a langhter chihmi cu Dr. Aung Htang le Dr. Aye Aye Ngun hna an si.

Dr. Sa Sa kong a tialmi cu, “Nihin Chin mino nih kan bochan ngaimi Dr. Sa Sa zong NLD Kawl party ah a lut cang timi bia chawkvai a um caah lung a tha hrim lo. Zeicatiah Dr. Sa Sa cu NLD lei in ramkhel chung a lut ahcun mifim mithiam pakhat a si nain NLD Kawl hruaitu pawl nih an fial ning tein a cawlcang ding a si lai i zeitikhmanah ah NLD lutlai hruaitu ah aa tel kho lai lo caah a si.”

“Cucaah fimthiamnak le cawn sannak a ngeimi Chin miphun hna nih nangmah le nangmah Chin miphun hruai kho ding aa zumhmi na si ahcun NLD Kawl party chung lut loin Chin party pakhatkhat ah lut ko tiah zaangfah kan nawl hna” tiah a tial.

Nain nihin NLD center lei nih cathanh an chuakmi Chin ramkulh chung NLD nih teinak an hmuh khawhnak hnga a cawlcangtu campaigner tuanvo pekmi minung 10 lakah Dr. Sa Sa zong aa tel ve taktak cang. NLD nih biatak tein an hmang cang tinak a si.

Chin ramkulh ah NLD caah a cawlcangtu ding hna cu Salai Isaac Khen nih a hruai hna lai i Dr. Sa Sa hi member ah aa tel ve lai. Cucu NLD center nih Chin ramkulh NLD ca cawlcangtu ding cathanh an chuah ning in theih a si.