Tu lio cu Dr. Sa Sa thangchiatnak rumro facebook ah a khat bantukin a um caah Dr. Sa Sa zong a ing sawh kho ve ti lo i, mipi sin nawlnak a tuah ve cang. Cu nawlnak a tuahmi ah “Kan Nawl Than” a ti i nawlnak rak tuah bal cang dawh a si.
Dr. Sa Sa nih nawlnak atuahmi cu a facebook ah a tarlangh i hi ti hin a tial. “Dawtmi ka phun hawi hna, thawngpang deu, mi pumpak dohnak le huatnak thawng zamh hi ngol cang u tiah zaangfah kan nawl than hna. Pathia nih kan miphun le kan ram thluachuah pe ko seh” tiah a tial hi a si. Mirang in a tialmi asi i, “I once again appeal to all my beloved people to please stop spreading the fake news, personal attacks and hate speeches. May God Bless our people and Country,” tiah a tial.
Dr. Sa Sa cu NLD ah a lut an ti i, tlawmpal ah Chin NLD nih teinak an hmuhnak hnga campaigner tuahtu committee chungah a min an van telh thok in biatak tein soisel a tong. Micheu nih mihrut ti tiang in an soisel.
Cu lawng siloin micheu nih a sianginn kainak, Doctor Degree hi a lak taktak hnga maw tiah zumh lo phun in a phunphun in an soisel i, nizan tiang ahkhan cu, India rammi sinak in Armenia ah sianginn a kai tibantuk, Dr. SaSa timi min in Doctor Degree a laknak a um lo ti bantuk tiang an soisel.
Cucaah amah Dr. Sa Sa zong aa sum khawh ti lo caah nizan October 27, 2020 ni ah a cunglei bantukin thawngpang deu, pumpak dohnak le huatnak thawngpang zamh lo ding in mipi sin nawlnak a tuah hi a si. Mipi nih a duhlomi zulhpiak khawh i zuam cio ve uh sih.
Source: Dr. Sasa
Leave a Reply