Eidin Zia Thiam Ding

By- Salai Lairam Thang: Laimi cheukhat nih rawl kan ei, kan din tik ah kan ka, kan lei, kan dang, le kan or diriamnak in rawl ei kan hmang, kan pum nih a duh le duh lo, a ziak le ziak lo, kan pum caah a tthat le tthat lo kan tuak lo. Kan ka duhmi paoh thuat thluahmah kan hmang.

Ngamdamnak a duhmi miphundang nih cun an or le an dang duhmi nakin an ngamdamnak le an pum ca tthatnak in rawl an ei. A hlei in US ummi nih cun kan ka duhmi nakin kan pum duhmi kan ei a herh. Kawlram ahcun kan ih hmun le kan thut hmun ah zinuaician din ahcun kan thlan a chuah caah cholesterol tampi kan khangh ko.

Asinain US ahcun AC le innchung tang kan um peng caah kan thlan a chuak lo, motor cung zongah kan thlan a chuak lo, rian kan tuannak zongah kan than a chuak lo. Kan thlan a chuah lo tik ah cholesterol le thau vialte cu kan pum chungah a erh i a chuak ti lo caah zawtnak a phunphun a chuak i, ruah lo pin nunnak a liam mi zong kan tlawm ti lo.

Cucaah a ram le a sining holh in kan ei le kan din kan i ralrin a herh. Sa tam tuk ei hi ngamdamnak a si lo, a hlei in sachungril, voksa le cawsa te hna ei cu cholesterol a tam bikmi an si caah kan hrial ah a tha, ngandamnak a simi vegetable tam deuh in ei i zuam hna usih. Exercise tuah zong i zuam deuh hna usih. Ngamdamnak tuah hi chungkhar family dawt zong a si.

Silei a cawngmi ka si na loin keimah tonnmi siaherhnak he hei hrawmh bia sawsawh si.