2019 Myanmar Idol Winner kan Lainu Esther Dawt Chin Sung nih a chunmang a rak chim tawnmi a tak in Pathian nih a tlamtlinter mi kong cu nihin ah a facebook page in a tarlangh. Cucu biakinn saknak kong a si. Cu kong he pehtlaih in a tanglei bantukin a tarlangh hi a si.
Pathian nih thluachuahnak a ka pek mi chung in thluachuah ka hmuhmi midang ka hrawmh ve nak kong tlawmpal chim ka duh. I uahnak pakhat hmanh aa tel hrimhrim lo. Paizone biakinn hi ka pa Korea ram a um lio te in Mission pakhat biak bantukin ka pa zong aa tel i sak hram an rark thawk mi biakinn pakhat a si.
Keimah pumpak zong nih ka phan bal ve. Ka phan hmasa lio ahcun a cung khuh le a tang phah lawng a si rih. Nain a chungah aa pummi hna nih Pathian an thangthat ning cu an thinlung tak in an thangthat i pumh a nuam.
Nain kum a liam bantukin keimah zong Chin Idol hlasak zuamnak ah Pathian thawng in Winner ka hmuh i ka thinlung chungah Panizone biakinn caah hlut duhnak thinlung ka rak ngei ve. Cu tic un ka nu le ka pa ka chimh hna i ka pa zong nih “ka fanu, na hlu duh ahcun hlu ko ca, a tlawm le tam a biapi lo” tiah thazaang a ka pek caah ka ti khawh tawk tein hlut hram kaa thawk ve.
2019 kum zongah Myanmar Idol hlasak zuam lio interview an tuah caan paoh ah teinak ka hmuh ahcun ka nu sii thlawpnak le Panizone biakinn saknak ca le nulepa ngeilo ngaktah caah hlut ka duh tiah ka leh tawn hna.
Harnak tampi chung in a pakhatnak ah Pathian nih a thluachuah a toih caah siseh, a pahnihnak ah ka nulepa nih thlacampiaknak thawng in le, a pathumnak ah ramchung ramleng mipi nih thazaang nan ka pek caah Winner ka co than tikah ka nulepa zong sii ka thlawp piak khawh hna.
Atu cu a chimh lawng siloin tuahsernak in tehte ka langhter khawh cang. Hi hi Pathian thawng in a si caah Pathian min ka thangthat. Amen Amen Amen.
Source: Esther DCS
Leave a Reply