Falam Le Hakha Kar Kahdohnak Ah SAC Ralkap 10 Leng An Thi

Chin ramkulh Falam in Hakha lei ah aa thawhmi SAC ralkap hna cu March ni 27 ah Chin ralkap nih an kah ṭhan hna, SAC ralkap 10 leng an thi tiah CNA in chimphuannak nawlngeitu Salai Htet Ni nih a chim. Sagaing ramṭhen Kalaymyo in Hakha Rungtlang ah riahcaw le thazaang chap ding in March ni 8 ah aa thawhmi SAC ralkap hna cu CNA le Chin hriamtlai phufonh nih an kahdoh hna caah zarh thum tluk a rauh tiang ah Hakha khuachung an phan kho rih lo tiah theih a si.

Falam pengchung zong ah kahdohnak pehtlai in a cang, March ni 27 ni kahdohnak zong ah SAC ralkap 10 leng an thi” tiah CNA in chimphuannak nawlngeitu Salai Htet Ni nih a chim. SAC ralkap hna cu lampi thluangthluan ah kan bawh hna i kahdohnak zong pehtlai in kan tuah ko tiah a chim. SAC ralkap hna cu March ni 28 ah Falam he meng 13 tluk a hlatnak Ṭaal khua le Tlangrawn khua kar an phan.

March ni 27 ni ah SAC ralkap hna cu Chin ralkap phufonh nih bomb puahhnawh in an doh hna caah SAC ralkap 10 hrawng an thi tiah theih a si.crd-the chin post. Thawng dang relchap-Myawady I Kahdohnak Ah Palik Bawi Nay Soe Telh In Palik 7 An Tlau, 4 An Thi Tiah SAC Nih Telegraph Ca A Chuah, Karen ramkulh, Myawady chawleh chawhrawlnak zone kahdohnak ah palik bawi changtu Nay Soe telh in palik 7 an tlau, palik 3 le ngunkhuai khawltu pakhat an thi tiah SAC nih Telegraph ca a chuahmi ah a langhter.

A luancia March ni 25 ah Myawady chawleh chawhrawlnak zone le Tinkan Ngyinaung palik sakhan cu kahdoh an tong i palik 3 ṭatkyatkyi Htay Win, ṭatkyatkyi Phone Myo Aung, palik Htat Su le ngunkhuai khawltu Nay Lin tiin 4 an thi. Palik bawi changtu Nay Soe, ṭatkyatkyi Myo Kyaw Thu, ṭatkyat Tin Htawy, ṭatkyat San Htwit Aung, ṭatkyatkyi Min Zaw Aung, ṭatkyat Hla Soe le palik Ye Paing hna cu an tlau tiah theih a si.

Tinkan Ngyinaung palik sakhan kahdohnak ah cun palik bawi duh-ṭatkyat Aung Myo Win cu a cal ah hriamngan kuan nih a peh caah hliamhma a tuar tiah SAC nih Telegraph ca a ṭialmi ah a langhter. Cobra Column nih cun Myawady chawleh chawhrawlnak zone cu luhhnawh in kan kahdoh hna, palik 11 an thi palik 7 le palik chungkhar in 1 kan tlaih hna tiah phungning tein cathanh a chuah.crd- The Chin Post.