Saṭil Zuva Ca Ah Falam Peng Parte Khua Mi Hna Nih Ruah Ti Khonnak Khor An Cawh, Chin ramkulh, Falam peng, Parte khua ah August 26 in Parte khuami nih an rak cawhmi ruah ti khonnak khor cu September 24 ah a dihlak in an lim cang, tiah Zalen nih a ṭial. Saṭil zuva nih ṭhal caan ah tlanh ding an ngeih khawh nakhnga Salai Aung Myint nih online ah mipi bawmhhalnak a rak tuah i, hleihlak bantuk muisam a ngeimi ruah ti khonnak khor cu khuami hna bawmhnak in an cawh khawh, tiah theih a si.
Ruah ti khonnak khor a cotu hi Parte khua mi mino 30 leng an si i zarhteni fatin an cawh tawn. Thla khat chung ah an lim khawh, tiah Zalen nih cun a langhter. “Zarhteni fatin te mino nih an cawh lengmang caah an lim. Cu pinah hi rian ṭuan chuah khawh a si nakhnga a tawlreltu Salai Aung Myint cung zong ah kan i lawm tuk. Ṭhal caan ah saṭil le zuva hna ca ah ti a har ti lai lo. Kum saupi ca ah thawpat le hai zong kan cin lai,” tiah khuami pakhat nih a chim.
Ruah ti khonnak khor hi a thuh pe khat le cheu, a sau pe 100 a si i cheukhat khor cu pe 60, 50 tluk tiang an cawh. Khor a cawhmi dihlak hi khor 28 a si. Khor an cawhmi a vang hi pe 10, 30 tiang a kau, tiah Zalen nih a ṭial, crd- The Chin Post. Thawng dang relchap- Khuapau Dohthlennak Chungah SAC Ralkap Kut In Tualchung Mi 4100 Tluk Nunnak A Liam Cang! SAC nih nawlngeihnak an laak hnu, khuapau dohthlennak chung ah democracy dirkamh in cawlcanghnak.
A tuahtu hna le tualchung mi nunnak a liammi cu minung 4100 an si cang, tiah ramkhel thongtla bawmtu AAPP nih an thanh. Tutan ah langhtermi cazin hi SAC nih hramhram uknak an laak 2021, February 1 thawk in 2023, September 22 tiangah SAC ralkap kut in nunnak liammi cazin a si i, min hngalh rih lo mi le ahosi theih lo in thah a rak tongmi 450 hrawng an um, fehternak tuah ding in kan hlatcuahmah rih hna, tiah an langhter.
SAC nih uknak an laak hnu ah an kuttang ummi ralkap le hriamtlai hna nih nikhat ah tualchung mi 4 tluk an thah hna. Phungning lo in thlaihkhih a tongmi dihlak hi minung 24,832 an si i, cu chung ah 19,260 hi hren rihmi an si. Cazin langhtermi hi AAPP nih a khomhsuat khawh vial in langhtermi a si i, hi nak in a tak ah an tam deuh kho. 2023, September 1 in 22 tiang ah SAC ralkap kut in nu 2 le pa 26, an dihlak mimung 28 tluk nunnak liam, tiah an langhter chih.
Leave a Reply