Falam Peng, Tuphei Sakhan Cu SAC Ralkap Nih An Chuahtaak

Chin ramkulh, Falam peng Tuphei sakhan um SAC ralkap pawl nih an sakhan an chuahtaak caah khualtlawng mi hna zong ralphaw hman dingin an tlaih khawhmi hna a si. Cucaah Falam-Kalay lam cu hman rih lo ding le zulh rih lo dingin CNO nih nihin November 22 ah lakhruak in thanhnak an tuah. November a zarhhnihnak ah Falam peng um SAC ralkap sakhan cheukhat cu CNA le CNDF nih an laak hnu in Falam peng um SAC ralkap cheukhat zong ralkap nih an chuahtaak cang.

Chin ralkap nih Rih le Ṭiau sakhan an laak i, Tibual le Var sakhan cu SAC ralkap nih an chuahtak hnu in Tuphei sakhan um SAC ralkap nih an sakhan cu an chuahtaak ṭhan. Thawng dang relchap- Kalaymyo Kahdohnak Ah Tualchung Mi 2 Nunnak A Liam! Kalaymyo, Duwaichaung khua ah umhmun a khuarmi SAC ralkap pawl cu PDF ṭangṭi phu nih an kah hna i kahdohnak a chuak. Kahdohnak ah SAC ralkap nih hriamngan an kah ruangah Duwaichaung khua chung ah a tla i inn cheukhat a rawh pinah kum 4 tluk.

Tg Mung Sawm Sang le kum 40 hrawng Pu Huam Ling Thanga an nunnak a liam pinah minung 3 hliam an tuar, tiah theih a si. Mung Sawm Sang cu meithal thawng le hriamngan thawng ṭih ruangah an inn pawng ah i thup dingin a kal lioah hriamngan kuan cu a pawng ah a tla i a lu ah hriamngan kuan choiper nih a khen ruangah a nunnak a liam, tiah Zalen nih a ṭial. Tualchung mi pakhat nih cun, SAC ralkap nih umhmun an khuarnak hi sang chung ah a si i tualchung hriamtlai phu nih an kah hna lioah siarem lo ngai in an kah hna, tiah a chim.

SAC ralkap nih hriamngan an kah tuk caah Duwaichaung khua telh in Nyaungtaw, Hanthar, Hnetpyutaw, Pinkhongyi, Pyitawthar le Letpanchaung khuami hna zong ralhrial in an zaam dih, tiah theih a si. Letpanchaung khua um Sevenday Biakinn zong hriamngan kuan nih a tlak i Biakinn a rawh pinah an Pastor zong hliam a tuar ve, tiah theih a si.

Leave a Comment

Leave a Reply

Your email address will not be published. Required fields are marked *