Federal Kan Duh Ti Tung I CNLD Vote Pek Ding Forh Cu ‘Chungtlik Lio Paracetamol Pek’ He Ai Lo

Kawlmi nih anmah duh in an kan uk cu kan duh cio maw? Nemmam hlah. Mah tein i uk khawhnak federal ngah kan duh maw? Duh tuk hen ta. Mah tein hruaitu tha thim khawhnak nawl ngeih kan duh maw? Duh tuk hen ta. Mah kan duhmi hi Pu Nothan Kap phu CNLD party nih an tlinter kho lai maw? An tlin khawhnak ding lam bi te tal a um maw? A um nemmam lo.

Aho nih dah a tlinter khawh kun lai? : Pu Zing Cung hruaimi CNF le Suu Kyi hruaimi NLD lawnglawng hi federal ram a ser kho ding dirhmun ah a ummi an si. CNF le tlangmi hriamtlai phu nih NCA hmang in Hluttaw leng ah federal ngah khawhnak ding an cawlcang. Suu Kyi phu NLD nih Hluttaw chung in an cawlcang ve.

An i tinhmi cu 2008 Constitution remh in ‘federal rampi’ ser ding khi a si, tutiang ah cun ralkap an lung an thumh rih lo caah duh ning in hmai an kal kho rih lo. Phundang in chim ahcun ‘federal kan duh’ tiah au lengmang tung i federal ram ser ding ah a nun caan sunglawi dihlak a petu Suu Kyi le a party NLD doh lengmang khi ‘mah til cumh’ he ai lo mi a si, kan luatnak ding caah thih zong tih loin dothlennak a tuahtu an doh i an soisel khi a si.

Chin party CNLD tanpi zong a thatnak a um ve ko, miphun min a hmangmi an si caah an dihlak an sung than ahcun miphun min a chia lai. Teinak an hmuh ahcun ramkhel biaruahnak le rampi hluttaw ah zalawng deuh in Chinmi kong an chim kho ve lai. Nain, ‘federal ram an ser lai, Kawlmi uknak in CNLD lawng nih an kan luatter kho lai’ timi ruahnak cu pialsual ruahnak a si, a dik lo tukmi a si, ‘Salai Lungthli Tum nih Angelina Jolie a thit lai’ timi capo he ai lo.

Hluttaw ah cun ‘kan duh’ tiah aukhuan poah ah kan duhmi kan ngah lai tinak a si lo, kan duhmi ngah khawhnak ding caah MP vote tampi ngeih a herh. NLD hmanh nih 2008 Constitution remh khawhnak caah a herhmi MP(75%+) an ngei kho rih lo. Party fate CNLD nih rampi hluttaw ah MP 75%+ an ngei ding cu mang hmanh ah a si kho lomi a si.

Kawlmi nih uk kan duh lo i federal ngah kan duh ahcun federal ram a ser kho ding CNF or Suu Kyi party NLD hi thazaang pek ding an si. ‘Federal kan duh’ ti tung federal ram ser ding ah kutke zong a ngei lomi CNLD hna ‘mee pe u’ ti cu chungtlik lio ‘paracetamol’ sii pek he ai lomi a si. Para nih chungtlik a damter lai lo, a zualter lehlam lai. Crd; Slai Lung Thil Tum.