Gangaw-Rezua Lam An Remh Khawh Cang

Thla Hnih Leng Tluk A Rawk Cangmi Gangaw-Rezua Lam An Remh Khawh Cang, Chin ramkulh, Matupi pengkomh Rezua peng ah ruah faak ngai in a rak sur ruangah motor lam a rak cimmi cu tlamtling tein kan remh khawh cang, tiah Zotung Federal Council nih an thanh. Gangaw-Rezua lam cung um Pangva le Lawngva khua karlak lam a cimh ruangah thla hnih leng lam a pit i Pakokku-Pauk-Kyaukhtu-Htilin-Gangaw-Rezua-Matupi-Lailenpi lam a zulmi motor pawl cu khual a tlawngmi an tlawm ngai.

Zotung hmunram mizapi ukhruainak phu nih lam a cimmi cu an remh, tiah theih a si. “Pangva le Lawngva khua kar lam a cimhnak hi a sau ngai cang. Hi lam hi mizapi ukhruainak phu tawlrelnak in an kan remhpiakmi a si,” tiah CDF ṭuanvo ngeitu pakhat nih Zalen ah a chim. A luancia August thla chung ah ruah faak ngai in a rak sur i Matupi peng Lunghlaw-Khawngan-Zakan khua karlak motor lam zong a rak cim i nihin tiang an remh rih lo, tiah theih a si.

Thawng dang relchap-Lailenpi Khua Ah A Hlan Bantukin Mipi I Ukhruainak Thawk Ṭhan A Si Cang, Chin ramkulh, Matupi peng, Lailenpi khua cu Chin ralkap ṭangṭi phu nih an laak i hmunram thianhfelnak an ngeih hnu ah tualchung mi hna cu khuachung ah an lut ṭhan cang i a hlan bantukin mipi i ukhruainak an thawk ṭhan cang, tiah CDF-Mara in ṭuanvo ngeitu nih Burma VJ ah a chim.

A luancia November 19 thawk in SAC ralkap le Chin ralkap phu kar kahdohnak fak a chuah ruangah Lailenpi tualchung mi hna cu a naih deuhnak khuate le India ramri ah an zaam hna. CDF-Mara nih hmunram thianhfelnak an ngeih dih hnu ah tualchung mi hna cu an auh ṭhan hna i mipi i ukhruainak cu a hlan bantukin an thawk ṭhan cang, tiah theih a si.

A luancia October 3 ah Mara-ram caan karlak ukhruaitu phu (Interim Maraland Council) cu rak dirh a si cang. Chin ramkulh, Falam peng, Rihkhawdar khua SAC ralkap sakhan zong Chin ralkap ṭangṭi phu nih an laak khawh hnu in mipi i ukhruainak cu a hlan bantukin an kalpi khawh cang, tiah theih a si.

Leave a Comment

Leave a Reply

Your email address will not be published. Required fields are marked *