1990 thimnak lioah Hakha Constituency in Pu Van Kulh (NUP), Pu Hre Lian Kio (CNLD), Pu Mang Lian (NLD) le Pu Lian UK (Independent) an rak izuam. Palian le pahawng lawngte an si. Thimnak a phi a hun chuak i hi lio caanah Chin miphun nih kan pabik in kan rak ruahmi le kan rak bochan ngaimi Pu Van Kulh cu Pu Lian Uk nih a rak tei ko. Pu Lian Uk cu the Giant Killer a rak si. Pu Van Kulh cu Laimi kan pabik asi i, upatnak pe ko usih, cuh duh hlah mu tiah Pu Lian Uk hi a rak thlauhtu an um maw ti cu ka hngal lo.
2015 thimnak lioah ralkap Acozah chanin kum saupi Chin ramkulh a rak kan uk cangmi le USDP Acozah chanah Chin ramkulh vuncichok zong asimi Pu Hung Ngai cu State Hluttaw Mindat Constituency No. 2 in ramkhelrian ah kan theih bal tuk theng lomi Pu Tike Thang nih a tei ko. Ngaingai cun Pu Hung Ngai cu ralbawi bochoh reng tiang a phanmi asi lengah vuncichok zong asi, a huham le nehnang zong a tam ngaingai.
Nain amah a chuahsemnak meehmun in a sung ko, State Hluttaw ah a mui a de ti lo. Pu Tike Thang cu the Giant Killer ti khawhmi asi.Hruaitu thimnak a phak tikah huhum le rumra a ngeimi milian le palian hi zenh an um ngai tawn. Cucu minung hmuhnak mitah asi. Nain, democracy ram ahcun biakhiaktu cu mipi kha an si tawn, zeitluk palian le milian zong kha paiatum te zong nih an tei lengmang tawn ko hna kha hmun tampi ah chim ding hi a um.
Democracy kan timi zauk phung cu competition tha a pe ngaimi asi. Kawlram ah one-party system kan duh lo tuk caah 1988 ah sandah kan piah i tuni multi-party system ah kan ithlenmi zong hi sullam ngei tein a hun cangmi an si. Party pakhat lawngte nih ram uk peng le bawi sinak tlaih peng kha “multi-party system nih a kalpining asi lo. Party poh nih “competition” covo kha tling tein an ngei tawn.
Leave a Reply