Hakha khualipi i NLD nih an hruaitu te hmanthlak cuanter in an signboard an tarmi cu sau a rauh hlan ah thlek piak an si. Cu kong he pehtlaih minung tampi nih CNLD tanpitu pawl an hrawkmi a si lai tiah ruahdamh cio a si. Nain tu zingah Salai Van Lian Thang timi facebook account ngeitu nih a hmanthlak he a riantuannak he a chuakkehnak he a tanglei bantukin a phozar dih.
“Hakha khualipi i NLD signboard a hrawhtu cu Kawl miphun, Chin ramkulh chungah cozah rian a tuanmi USDP tanpitu pakhatt a si i amah nih NLD signboard a hrawk mi cu Chin party CNLD nih an hrawk ti phun in mipi nih ruah hna seh tiah a phunphun in a chimtu a si ti si.”
“A facebook account min ah Chin min a hman nain Kawl miphun USDP party chungtel pakhat a si. Magwe ramthen, Taungdwingyi ah a chuakmi a si tiah theih asi. NLD signboard pawl a hrawktu cozah riantuan pakhat a si i CNLD nih hrawk bantukin a chimtu a si. Cucaah Chin min in facebook account hmangtu vialte Chin miphun an si lo timi mipi theihter kan duh hna. Southern Chin (15/09/2020)”
A cung i hi Salai Van Lian Thang timi facebook account ngeitu nih a tialmi cu a si. Cu kong he pehtlaih in Salai Van Lian Thang nih a puhmi pa Thang Khai nih a tanglei bantukin fianternak a tuah ve. A tialmi cu;
“Van Lian Thang kha ka chimh piak uh. Cu Kawl cozah riantuan USDP tanpitu pa na theih ahcun tazacuai khawh a si. Nangmah nih na porhmi paoh a zumhtu mi thathu hna zong ka zaangfah hna. Ka fa upa, keimah ka umnak innkhan sak ning bantuk ahhin cozah riantuan sawhsawh pakhat nih an um khawhnak hmun a si maw?”
“Hakha ah cu bantuk cozah riansang a tlaimi nih innhmun an ngei cang maw? Tha tein hlat rih. Nangmah nih lih thawngpang na phuanmi hi CNLD hruaitu hna zong nih an i zumh sual i an pholangh chin. Zaangfah ngai an si” tiah a tarlangh ve.
Hi kong he pehtlaih in CNLD hruai Pu No Than Kap zong nih a share ve caah Thang Khai nih CNLD hruaitu tiang nih an zumh a tinak a si kho. Ahodah a hman timi theih fiang khawh a si rih lo.
Source: Salai Van Lian Thang
Leave a Reply