Hakha Khuapi Ah Kah Dohnak A Chuak Ee

Hakha Khua Hlun Sang Ah SAC Ralkap Le Chin Hriamtlai Phu Karah Kahdohnak A Chuak, Chinram khualipi Hakha khua hlun sang ah SAC ralkap le Chin hriamtlai phu kar kahdohnak a chuak, tiah tualchung mi hna sinin theih a si. Nihin January 29 zanlei suimilam 2:00-3:00 karah SAC ralkap pawl cu dawr hlun sang in khua hlun lei ah an ṭum i Chin hriamtlai phu nih an kah hna. Khua hlun lei a ṭum mi SAC ralkap pawl cu an tam ngai. An i kahnak hi khuachung a si ko nain tualchung mi aa hliam mi an um hraw lo, tiah tualchung mi pakhat nih The Chin Post ah a chim.

Nihin khua hlun sang kahdohnak ah kaphnih in a thi mi le aa hliam mi an um lo, tiah theih a si,crd- The Chin Post. Thawng dang rel chap ding ken peh relchap- Karenni ramkulh, Mawchi, Ywathit, Nanmekhon le Mese khuapi cu Karenni ralkap le ṭangṭi phu nih kan uk cang, tiah Karenni Army (KA) ralbawizik Colonel Bone Naing nih RFA ah a chim. Karenni ralkap le ṭangṭi phu nih Nanmekhon, Mawchi le Mese khuapi cu an uk dih cang i Ywathit khuapi tu cu tlawmpalte a taang.

SAC ralkap nih Ywathit khuapi ah vanlawng in kahdohnak an tuah lo nain Shiataw le Loikaw khuapi tu ah cun vanlawng in kahdohnak an pehzulh, tiah theih a si. Hpasawng peng Mawchi hmunram ah SAC ralkap nih an sakhan an chuahtak hnu ah Karenni ralkap nih Mawchi hmunram cu kan uk cang, tiah Karenni Nationalities Defence Force (KNDF) nih nizan January 28 ah an thanh.

Karenni Nationalities Defence Force (KNDF) nih cun,”Bawlakhe peng Ywathit khuapi zong kan laak i Ywathit le Bawlakhe khuapi kar meng 12 SAC ralkap sakhan lawng a taang, Shiataw peng zong ah SAC ralkap sakhan pakhat lawng a taang cang”, tiah an langhter. Loikaw khuapi le Shan ramkulh thlanglei Moebye le Phekhon khuapi lawng ah SAC ralkap nih umhmun an khuar cang, tiah KNDF nih cun an thanh chih.

Leave a Comment

Leave a Reply

Your email address will not be published. Required fields are marked *