SAC Ralkap Le Palik Nih Dawrhlun Sang Khual Cazin An Chek, Pa Pathum An Tlaih Hna, Chin ramkulh khuapi Hakha dawrhlun sang ah SAC ralkap le palik nih khual cazin an chek i pa pathum an tlaih hna, tiah theih a si. Nihin September 4 zing suimilam 8:20 hrawng ah SAC ralkap le palik 20 reng lo nih dawrhlun sang ah khual cazin, chungkhar cazin le NRC an chek. Palik deuh nih biahlanak le cheknak an tuah i SAC ralkap nih an zulh hna, tiah Hakha umi pakhat nih The Chin Post ah a chim.
SAC ralkap le palik nih zingka tein khual cazin an chek i pakhat khat thil a um caah maw a si hnga ti cu ka hngal lo. Khual an um le um lo hi an chek bik. Cu pinah chungkhar cazin zong an chek i NRC zong an chek,” tiah a dang tualchung mi pakhat nih The Chin Post ah a chim. Nihin September 4 zing ah SAC ralkap nih dawrhlun sang khual cazin, chungkhar cazin le NRC an cheknak ah pa pathum zong an tlaih hna. Zeiruang ahdah an tlaih hna ti cu hngalh a si lo, tiah theih a si.
A luancia August 28 zing suimilam 9:30 hrawng ah Auto zung pawng ah pa pakhat cu cycle in a kal lioah palik nih an rak dirter i a phone an zoh hnuah an tlaih i motor cung ah an rak kaipi, tiah theih a si. Thawng dang relchap-ASEAN Foreign Ministers Hna Nih Myanmar Kong Ceihmainak An Ngei, Indonesia ram khualipi Jarkata ah nihin September 4 ah tuahmi ASEAN Foreign Ministers hna tonnak ah Myanmar ram kong cu a bik in ceihmainak ngeih a si lai, tiah ASEAN Chairman, Indonesia Foreign Minister nih a chim.
ASEAN palai hna cu theihternak tuah an si cang bantukin Myanmar ram kong ah ASEAN biahren 5 cu a tak in tlamtlinh a si khawh nakhnga khua ruat ṭhan dingin, Indonesia Foreign Minister Retno Marsudi nih nihin September 4 meeting hunnak ah a chim. Myanmar ram a daih khawh nakding le a ṭhat khawh nakding ah a fekmi a phi pakhat kan kawl a hau. Cu lawng ah ASEAN hi a ṭhawng lai, tiah Marsudi nih cun a chim. ASEAN palai hna nih hin thaizing September 5 zong ah Myanmar ram kong an ceih lai, tiah VOA nih a ṭial.
ASEAN palai hna tonnak ah SAC cu an sawm lo i a ra laimi ASEAN hruaitu lu bik hna nih an tuah dingmi meeting zong ah sawm an si lai lo. Cu pinah U.S, Tuluk, Japan, South Korea le Australia telh in ASEAN he ṭangṭi ram hna hruaitu an kai dingmi tonnak zong ah SAC luzik le Foreign Minister zong kai kho lo dingin an kham hna, tiah theih a si. Nihin ASEAN palai tonnak ah hin Myanmar ram kong, thlanglei Tuluk rili kong, ASEAN ramchung chawleh chawhrawlnak kong le phungning lo ram khat in ram khat luhnak kong hna an ceih, tiah VOA Burmese nih a ṭial. Hmathlak Nihin September 4 ASEAN palai tonnak Reuters nih hman a thlakmi ah Myanmar palai ṭhutnak hmun a lawng.
Leave a Reply