Ralkap nih March 12, chun 12:00 hrawng ah Hakha Sii-inn cu an luhhnawh i zaanlei 6:00 tluk ah Hakha mino nih Sii-inn Innka an hrenh, tiah thawng kan theih. Ralkap nih Hakha Sii-inn quarter ah a um i CDM a luut mi hna cu an thialter hna i sii-inn ah mizaw aa thlop lio mi zong an chuahter hna.
Ralkap nih sii-inn ah hmunhma an laak hnu tlawmpal ah Hakha mino cu sii-inn ah chuak i quarter in thilter mi hna cu thil thial zong an bawmh hna. Sii-inn quarter in thialter mi hna an i thial dih hnu, zaanlei 6:00 tluk ah hi bantuk in Hakha mino nih Hakha Sii-inn kutka tawh an hrenh hi a si, tiah kan theih. Hakha Sii-inn ah hmun a khuar mi Ralkap hi minung 40 tluk an si lai, tiah ruah a si.crd- DVC
Ca dang rel chap: CNF/A hi nan kan uhtanh ko, nan mawh lo, amah belte hriamtlai dang he tahchunh awk kan tha deuh lo: Pu Htet Ni, Atulio kan ram buainak kong ah mizapi nih CNF/A hi nan kan uhtanh i nan mawh lo, amah belte Tlangcung hriamtlai dang he tahchunh awk kan tha lo, tiah CNF/A Chimphuannak Nawlngeitu Pu Htet Ni nih a chim.Nationwide Ceasefire Agreement (NCA) ah minthu ciocio Tlangcung hriamtlai hi kan i khat hna lo.
Kannih CNF/A cu Bilateral Agreement ah umnak hmunhma (control area) kan ngei. Phundang cun umnak hmunhma a leng ah meithal, uniform he cawlcangh thiam a si lo tinak a si. KNU khi NCA ah minthu mi an si ve nain rikhiah mi hmunhma (control area) an ngeilo. Mah belte an thazaang a thawn ca ah anmah tein control area an i ser khawh. Thazaang an ngei ca ah an hmunhma chung ah an cawl kho ngai.
Thil a um rih mi cu an control area ah hin Kawl ralkap zong hmunhma an laak ve tik ah i kah peng cu a si ve hoi. Atu CDM kong ah an cawlcangnak khi anmah control area chung ah a si. Kan dirhmun aa khat lo i hihi mizapi nih a ruah zia an thiam deuh rua lo. Chungtuan an si ve lo tik ah an mawh ve bak lo.
Kanmah CNF zong kan hmunhma ah Kawl ralkap hi hmun khuar ve hna sehlaw kan buai ve kho ko,” tiah Pu Htet Ni nih The Hakha Times ah a chim. Zeipoh a si ah hriamtlai dang hna cu thazaang an ngei. CNF cu hriam thazaang kan tlacham tuk. Thazaang ngeih i mizapi nih dirkamh tham ahcun kan cawlcang kho tuk ve ko lai, ti zong Pu Htet Ni nih a chim fawn.crd- the hakha times
Leave a Reply