Tutan cu 2020 thimnak a nai cang tikah party kip siseh, independent pawl zong nih siseh, anmah le an si khawh cio lam kawl in mee pek sawmnak an tuah cio hna. Cu bantuk CNLD party zong nih Hakha nungak muidawh pawl hmang in video in sawmnak an tuah ve. Cu video cu a tang bik ah tar chih a si.
Cu video na zoh hlan ah CNLD mee pek sawmnak a si bantukin Salai Ceu Bik Thawng nih Zeiruangah CNLD (Miphun Party) Vote Pek A Herh tiah capar a tialmi rel chih lo awk a that lo caah a tangah kan van tthil piak chih hna.
Zeiruangah CNLD (Miphun Party) Vote Pek a Herh: Salai Ceu Bik Thawng
1.Kan Chin miphun covo vialte khuakhirh than a hau cang. Panglong Hnatlaknak biahren cu Kawl (cozah) nih kum 70 renglo, nihin tiang, an buar caah kan miphun, kan nunphung, kan vawlei-ramri, kan biaknak le kan caholh cu a phunkip in dodit i an kan dolh. Cu a rawk cuahmahmi kan miphun Jerusalam vampang sak thanding le kilvennak ding federal mahte-khuakhannak(self-determination)caah miphun dang ibochan awk atha lo. Kanmah tein kan sahngar-ar kan i runven khawh a herh.
2.NLD le USDP nih Chin miphun sernak le damnak policy an ngeilo. USDP party cu thanchonak(development) tuah lawng a thiam. NLD cu ralkap cozah doh in democracy ngah ding tiang lawng aa hmaithlak, democracy pakhatnak, pahnihnak le pathumnak’ timi policy ahramthawk tein aa tlaih. Federal hi nai cikua ah an velhle in an telh chapmi a si. Phunghrampi remhnak biatung 114 points an chuahpimi ah federal le tlangcungmi covo kong mu-khat hmanh ai tello.
3.2008 Phunghrampi remhnak ah Miphun Party (CNLD) thazang thawnter a herh. NLD lawng in Phunghrampi remh a ngah lo tiah kum 2015 lio tein kan rak chim pengmi cu atu zapi nih hmuhfiang a si cang. UPC(21st Panglong) timi ramkhel cabuai biaruahnak in Tlangcung Hriamtlai Buu, Kawl-Ralkap/Cozah le Ramkhel Party pawl nih lungthu-thumkomh in hnatlaknak (Pydaungsu Accord) tuah dih hnu lawngin Phunghrampi cu remh le thlen dingmi a si.
Cu cabuai cungah miphun ai-awh in kaimi CNF le tlangcung hriamtlai phu pawl lawng si loin CNLD le tlangcung miphun party pawl he sum an vaa ithuanh le an i dirkamh a herh tuk. Phunghrampi thlen/remhnak lawng si loin, cu thlen/remh tikah Chin miphun nih kan duhmi aa tel ding zong a biapi tuk. NLD lawng nih remh sehlaw kan duhmi ai tel dih lailo ti kha a fiang cang ko khah an chuahpimi 114 zoh in.
4.Varit le Vaking awh tti a hau. Myanmar ram buainak hi ralkap cozah thlaak in democracy ser lawngin a za lo i federal miphun covo khuakhirh lawngah a dai dingmi asi. Chinmi nih kan herh tukmi nuhrin holh in cacawnnak nawl, Chin State ramri khuakhirh thannak, Chin Miphun Ni zungkharnak nawl, Khrifa biakinn le vawlei pawl biaknak laisen pek ding, kokek thilmansung thenphawtnak nawl, Chin Act upadi tharchuah le nunternak tibantuk cu Phunghrampi (2008) remh hau loin NLD cozah nih a tuah khawh tukmi si ko nain a kan tuahpiak duh lo.
Cucaah democracy NLD varit awh lawngin a za lo i Miphun Party caah vaking kan awh ve a hau cang. Kawl nih NLD varit an pek i Tlangcungmi nih miphun party vaking an pek ve ko ahcun khoika awngkua hmanh in cepa (angkihring) an rak lut kho lai lo.
5.CNLD nih tha deuh in cozah tlaih ding timhcia a si cang. Nay Pyi Taw in miphun dang nih chaak/hnarphaw-hri rengh chommi NLD le USDP nakin cun Chin ah a ke a chia i Chin ah a lu a chiami buu CNLD nihcun Chinram kong cu a tuaktan deuh, a theih deuh i a tuan khawh deuh lai ticu lungrumh awk a um lo. Chinram hruainak ding caah CNLD nih Policy Manifesto zong Dal (sector) 22 le Cang (policy point) 154 in a suai cang i arauh hlan ah mipi sinah cauk in a chuahpi cang lai.
Cucu party hruaitu pawl le ramchung ramleng mifimthiam hna ibawm in tialmi a si. Cu nihcun zeitlukin dah timhtuahnak tha kan ngeih ti a langhter. USDP le NLD bantuk in NPT cabawm a pohmi mivantha pa nih timhlamhnak chunmang (Manifesto) zeihmanh ngei loin lakhruak in lohma domh le khawhton in Chinram hruai kan itim lo. CNLD cu a policy in siseh, hruaitu thatha a ngeihmi in siseh, a dirkamhtu mifimthiam tampi hna he siseh, Chin cozah ser ding le hruai dingah ready a si cang. Credit: Salai Ceu Bik Thawng
CNLD Vote pek sawmnak video;
https://www.facebook.com/CNLDHakhaThantlang/videos/755372301908686/
Video: Chin National League for Democracy – Hakha-Thantlang
Leave a Reply