Zaan 4 chung SAC ralhrang bomb le meithal kuan nih thinphang thlalau in a chiahmi Chin-Oo-Sii, Nazareth sangmi cheuchum nih nihin ah an inn an chuah tak i hmundang ah an i tthial hna, tiah thawng kan theih. Zaan 4 chung thinphang in an um pin ah nihin chun sml. 2:00 ah an i kap lai timi thawngpang a len caah an inn an chuahtak hna hi a si.
Nazareth sang upa pakhat nih, “Suimilam pahnih hnu in an i kap lai tibantuk in thawng diklo a leng i mipi an lau. Zaam an i tim lo nain inn tam deuh cu zaan lei sml. 2:00 hnu in an i tthial pah dih hna. Zaam ding a si lo tiah kan ruah ko. Kan zaam tik ah ralkap pawl an lawr lai i kan inn kan lo an him lo. Nizaantihni zong ah tawh an hrenhmi inn pakhat ralkap nih an bauh i Laithil kuang khat an lakpiak hna,” tiah a chim.
Nazareth sang ah a ummi pastor pakhat nih, “Nihin chun sml. 2:00 hlan ah SAC ralkap nih chuak dih uh a kan ti timi thawngpang a leng. Nawlpeknak catlap ngaingai cu a um lo,” tiah a chim ve. Abikin, Mara biakinn rii in thlanglei hi cu inn a lawng pah dih ko. Inn chuahtakmi hi inn 40 hrawnghrang kan si lai.
Zaan 4 chung meithal kuan le bomb nih kan inn pawl a khen tik ah kan him ti lo. Cun, bomb puah thawng le meithal kah thawng hrimhrim hi kan celh lo,” tiah a cunglei pastor nih a chim chap. Nazareth sang a chuahtakmi hna lak ah Hakha khuachung chungkhar sin ah aa fonhmi an um bang in inn hlan ding in aa timtuahmi zong an um hna, tiah thawng kan theih. Crd-The Chin Journal
Thawng dang: Kalay peng chungah September 8 nizaan ah Khuabawi minung 2 cu meithal in an kahthat hna hnu ah khua 5 khuabawi hna cu rian din nak ca an tial. Kalay peng Lah khuakomh khuabawi U Shwe Zam Thang, Chin Suh khua khuabawi U Van La Mon, Aung khua khuabawi U Tin Lin Mg, Myah Sing khua khuabawi U Won Sin Puang le Sin khuakomh khuabawi U Suah Ling hna cu,
September 9 ni ah rian dinh nak ca an tial tiah ramkhel kong ah riantuan mi pakhat nih a chim. Nawlngeihnak lak hnu in khua tam deuh khuabawi cu rian in a din mi an tam. A tu hna hi cu rian dinh lo in pehzulh in a tuan mi hna an si. A tu cu an tih i rian an i dinh nak hi a si. Mipi hna sin ah zumh a tlak lo mi cu a lam ning tein kal a si ko lai ” tiah Kalay myo ramkhel pakhat nih a chim.
Kalay peng chung ah September 8 Zan Kalay peng Maw Si khua le Pin Kone Kyi khua ah khuabawi 2 cu Dalan thiahtu phu nih an mah inn ah meithal in an kahthat hna. Kalay peng chung ah ralhrang lei tang mi zei bantuk minung a si mi poh poh cu thianh nan si lai tiah khuami hna nih an chim. Crd- the chin post
Leave a Reply