7 October 2020 ah minung pathum komh in car kan hlang i motor driver telh in minung pali cu Yangon-Hakha lei ah kan rak i thawh hna (Minung pakhat ah bus fee 35000 a rak si tawnmi kha atu Covid ruangah bus nganmi cit a ngah lo caah car kan hlanmi si kaw mi pakhat ah 20,0000 asi). Pakokku ah 12-4am tiang lockdown ruangah kan tang. Khual tlawngmi zaangfahnak thinlung he gate cawngtu pa nih changreu thoh 3 le ti thawl hnih a kan pek. Kan i lawm ngai. Zinglei pali tlin in kan rak i thawh than.
Gangaw vun lonh ah rawl dawr i rawl ei a ngahlo caah parcel in kan cawk i khua leng thlan ah rawl kan ei. Yangon-Hakha ka khual lam ah atu hi ka voikhat tonnak asi. A nuam pah thlulh. Aho ruangah tiah Covid ruangah a si.
Kan khim in kan rak i thawh than i Pathian lamhruainak thawngin dam tein zanlei 2:30 ah Hakha tool gate kan hung phan. Khoi ka in a tlungmi dah nan si an kan ti i Yangon kan ti cu a kan zohtu an mit au aa dang colh. An mawh lo, Kawlram ahcun Covid tam biknak hmun Yangon cun pei kan rat fom cu. Kan ruahnak men zong a si kho ko nain an kan zoh dan cu vawlei dang in a rami ko kan i lawh ter.
Ngandamnak lei riantuantu nih kan upa pakhat kha nang cu nahtahlah ah na um lai a ti. Keimah le ka nu Thawngthawng nu kha nannih pahnih inndwinhmuh ah nan Q lai a kan ti.
Kan car cun kan Q nak ding hmun ah an rak kan thlah. Kan Q nak ding hmun cu zanlei suimilam 3 ah kan phan. Keimah nih ka rak ruahnak ahcun minung kan tlom te theu lai tiah. Minung 14 an rak um cia cang. Yangon hmanh ah chungkhar sin dah ti lo covid ttih ah mi sin chuah hmanh ngamh loin mah lawng a um pengmi caah Covid runvennak Quarantine hmun ah mi kan tam cu ka lung a nuam ruam loh.
Tuanvo ngeitu sinah inn cung dot khi a lawn ko caah inn cung a lawngmi hmun ah kan chia ko ulaw tiah ka nawl hna tikah cunglei upa kan chimh hmasa hna lai ti a si. Siaremlo ngai khin kan hei um. Q hmun ah siarem ding cu kan rak i ruahchih mi cu a si ve lem lo nain a phan tharmi kanmah pahnih he cun minung 16 kan si lengah ihnak kha kan i naih pah caah khan minung tam hrat cu i runvennak a har deuh caah kan sia a hei rem lo bia khi a si.
Kan phak zan suimilam 9:30pm ah ngandamnak lei tuanvo ngeitu an ra i bia an kan chimh. Zantim le khuamang ah zeibia ko dah an kan chimh hnga ti cu tuzan ka rak peh te lai.
(A sasawh in kan cungah zeihmanh a tlun lo bang zeiruang lo ah a cangmi thil zong a um lo. Kan mit in kan hmuh khawh lomi phen ah Pathian nih a kan tinh piakmi le hmuhsak a kan duhmi a um hrimhrim ti ka zumh ko). Thlacam tu kan bawm ko u law tiah, SLT.
Credit: Sayamah Sui Len Tial
Leave a Reply