Hakha Sii-Inn Ralkap Le Palek Nih An Luhhnawh, An Dirhmun A Tha Lo

Kan dirhmun a tha lo, khuapi le mino nih nan kan chuahhnawh a hau tiah Hakha Siibawi pakhat nih atu nai chunhnu 12:15 ah The Hakha Times ah a chim. A tu hi an kan ton i kan i ceih cuahmah lio a si. Asinain siibawite cu kan chuak dih lai kan ti. A dang Staff pawl vialte cu anmah duhnak kan hal ta hmasa hna lai, kan dirhmun a tha lo tiah a chim than.

Sii-inn chung ah a um mi Nurse pakhat nih zanlei suimilaam pathum tiang kan in hngah hna lai i cu chung ah CDM a tuah mi poh chuak dih u, an kn ti tiah a chim. Atu a ra mi ah hin ralkap lei in Biohahmu le Chin State Administration Council in Pu Kyaw Ngein le upa dang an ra tiah kan theih.

Cadang relchap: Ralkap hi NCA minthut ruang ah an ra lengmang ko nain a chung taktak an luut bal lo: Pu Htet Ni, Camp Victoria ah Kawl Ralkap an rak luh tawn mi hi Nationwide Ceasefire Agreement (NCA) minthutnak ruang ah a si i a chung taktak cu an luut bal lo, tiah CNF Chimphuannak Nawlngeitu Pu Htet Ni nih a chim.

Kahdaihnak min kan thut hnu ah kan camp tiang hi an ra lengmang ko. Asinain a chung taktak cu an luut bal lo. Tutan an rat zong hi CDM in a zaam mi Camp ah nan chiah hna ti thawng kan theih i kan ra, an ti. Buainak a um lo. CDM in a rak zaam mi zong Mizoram ah an pet/kal dih ko,” tiah Pu Htet Ni nih The Hakha Times ah a chim.

Tutan an rat ah hin Palek a zaam mi kan pe than u an ti nain an um lo. Kanmah lei nih CDM luh le tuah ruang ah tlaihkhih mi vialte thlah ding in kan chimh hna. Zalong tein lam a zawh mi hnahnawh lo ding le hrem lo ding zong kan chimh hna, tiah Pu Htet Ni nih a chimchap, crd- the hakha times

Leave a Comment

Leave a Reply

Your email address will not be published. Required fields are marked *