Hakha thawng pang Datsi kongah

Hakha Ah Datsi A Dih Lai Tiin Thawngpang A Len Caah Datsi Aa Cawkcia mi An Tam, Chin ramkulh khuapi Hakha ah datsi a dih lai tiin thawngpang a len caah datsi aa cawkcia mi an tam, tiah theih a si. Datsi aa cawkcia mi an tamnak a ruang cu Gangaw-Hakha lam a awn lo caah datsi a dih khomi a si, tiah an chim. Cheukhat cu pung nganpi pung thum hna in datsi an i khon. Datsi man tu cu a kai rih lo, tiah tualchung mi pakhat nih The Chin Post ah a chim.

Gangaw pawng Kalay lampial hrawngah SAC ralkap an um caah khualtlawng motor tampi zong Lamtuk ah an taap. Kalay-Maharmyaing lam zong a awng lo i Kalaymyo ah datsi gallon khat ah kyats 30,000 leng a phan. Shan ramkulh chaklei Laukkai khua ah datsi gallon khat kyats 80,000 tiang a kai ve. Hakha datsi a cawtu an tam ngai caah datsi dawr cheukhat cu an khar cang. Datsi dawr ngan deuh lawng ah datsi a taang i cu hmanh cu tampi in cawk an siang ti lo.

Hakha ah hin datsi man aa khat cio lo nain a buaktlak cun gallon khat ah kyats 16,000 a phan, tiah theih a si. Thawng dang relchap- Rihkhawdar Khuapi Ukhruainak Ah Mizapi He Rian Kan Ṭuan Lai Tiah CNF Nih An Thanh, Chin ramkulh, Falam peng Rihkhawdar khuapi ukhruainak tlamtling tein a kal khawh nakhnga rianṭuan kan i zuam lai, tiah CNF nih cathanh an chuah. Myanmar-India ramri um Rihkhawdar khuapi um SAC ralkap sakhan 2 cu November 13 ah CNA, CDF-Zanniatram, PDA-Tedim, CDF-Thantlang le CDF-Hualngoram nih an rak an laak.

Rihkhawdar khuapi cu Myanmar-India ramri ah a ummi a si i chawleh chawhrawlnak ah hman ngaimi a si pinah mizapi himnak ca ah a biapi ngaimi a si caah CNF le HPO(Hualngoram Peoples Orgaization) cu mizapi himnak, Rihkawdar khuapi himnak le No. 2 India-Myanmar ramri a daih khawh nakhnga, tualchung mi hna nih Rikhawdar an sersiamnak le an i ukhruainak ah rian kan ṭuanṭi lai, tiah CNF nih an thanh.

Kahdohnak ruangah ralhrial in a zaammi hna zong khua chung ah an rak luh ṭhan khawh nakhnga CNF/CNA le HPO/CDF – Hualngoram nih an tawlrel, tiah theih a si. Kahdohnak ruangah ralhrial in a zaammi hna, hliamhma a pumi ralkap hna le mizapi an harnak a bawmchantu Mizoram cozah telh in India central cozah, Mizoram rammi hna le community dihlak cung ah lawmhnak nganpi kan ngei, tiah CNF nih an langhter.

Leave a Comment

Leave a Reply

Your email address will not be published. Required fields are marked *