The Second Lady Dr Anna Sui Hluan nih Australia, Perth khua a rak kan tlawn lio ah ahawikawm tha asi mi Christina cu theih ter nak akan tuah piak hnu ah Christina Cheng, Dr. Hilary Thean, Karen Soh cu Chin ramkulh Hakha, Thangtlang, Mon ram le Shin ram ah vui hnih tiang tlung pi an rak si.
Hakha University Library cauk pawl an zoh tik ah an lung atha lo ngai… University pakhat ah cun carel ding cauk tha tha tampi um ding si. Library caah cauk nan chiah mi a tlawm tuk tiah an kan ti.
Hakha College cu Hakha University ah an vun thlen caan lio te ah hibantuk in cauk tha tha bawmh nak an kan pek hi Bawipa khuakhan mi asi lai tiah kan zumh.
Kan miphun thancho nak caah a kan bawmchan kho tu he theih ter nak a kan tuah piak tu Dr Anna Sui Hluan cung ah lawmhnak tampi kan ngei. Upat nak zong kan pek.
Hi cauk kan kuat khawh nak ding ah Pu Ro Thawng le Singapore Chin Community cung ah siseh, Chin Ramkulh cozah le Kawlram cozah sin ah a herhmi ca a kan tawlrel piak tu Salai Sang Hnin Lian le Ko Deeram Khong cung ah le Yangon in a herhngai mi ca hmuh khawh nak ding ah a kan bawm tu Pu Thawng Za Lian, Rev Peter Ngun Za Cung le Pu Lian Iap le All Chin Society cung ah lunglawmhnak chimcawklo kan ngei.
Chinmi nih lung khat tein hmunkhat ah rian kan tuan ti nak thawngin atu ban tuk in kan tuan chuah khawh nak hi asi. Hmai lei zong ah hmunkhat te ah lung rual tein rian kan tuan ti ah cun kan miphun caah hlawknak kan hmuh hrim hrim ko lai.
Credit: Renny Ceu L Mang
Leave a Reply