Hi Hna 3 Hi Vote Na Pek Ahcun Na Vote Kha Zero A Si Ko

Na Vote kha Zero a si sual hnga maw (30. 10. 2020); Thimnak ah hin cozah (2) caah Vote thlak a si. Pakhat hi rampi sersiamnak le hruainak a kalpitu Central Cozah caah a si i a fiannak caah Pyitu Hluttaw le Amyota Hluttaw caah Vote pek a si. Pyitu Hluttaw le Amyota Hluttaw kozale pawl hi Naypidaw ah Meting a kaimi an si.

Pyitu Hluttaw meting le Amyota Hluttaw meting hna hi adang an si. Rampi caah a herhmi biakhiah ding a um tikah Hluttaw (2) fonh in meting tuah a si. Cucu Pyithaungsuh Hluttaw ti a si. A hngalh lomi caah ka langhtermi a si.

Pahnihnak hi Pyine (state) le Taing (division) caah thlakmi hi Ramkulh cozah ‘or’ Taing cozah caah a si. Vawi (1) thlak ah Pyitu Hluttaw kozale, Amyota Hluttaw kozale le Ramkulh cozah tiin minung (3) ca Vote thlak a si.

Nihin tiang mipi zong Candidate (cuhtu) pawl zong kan ka in a chuakmi hi aho hi kan pek ah a țha lai, zei party hi pek usi law a țha lai, keimah nih nan duhmi kan tuahpiak khawh lai, kanmah party nih cozah a tlaih cang lai timi hrawnghrang ah caan kan dih rih ko. Amah hi biachim a nal, amah hi zumh awktlak a si timi ah kan buai cio rih.

Minung tampi cu anmah hi kan pek ahcun cu hmun ah tuanvo a ngei lai, cu thil cu a kan tuahpiak lai ti hmanh hngalh loin pawngkam bia poh a zumhmi kan tam tuk rih lai. Politics cu lihnak zong a tel, hlennak zong a tel ve caah zumh awktlak in a chim thiammi poh zumh deuh an si ko. Lungfimmi pawl lawng nih zumh awktlak le tlaklo an thleidannak an ngei khawh.

Hmaizarh November 8 cu kum 60 tang mipi caah Vote thlak a si cang lai. Ni (8) lawng a tang cang. Atu tiang kei cu cu party ka pek lai, cu party cu tazeih ‘Logo’ cu cubantuk a si lai, ti tiang a fiang rih lomi kan tampi rih lai. Tukum cu Covid-19 ruangah Vote thlakning cawnpiaknak hmanh a um kho ti lo.

Khuapi lei cu a ning deuh ko nain khuate lei ah cun cawnpiak lo ahcun kan Vote hi sullam ngei lomi “man ngei lomi” Zero dirhmun phak a fawi tuk. Tazeih cumh palh ahcun a dih ko, Zero a si ko. A biapi bikmi cu Candidate pawl min hngalh a hau lo, party Logo hmanthlak te chinchiah ding a si.

Chin state ah cun minung (3) ca lawng pek ding a si ko caah pek duhmi party Tazeih “Logo” te kha fiang tein ichinchiah, na pek duhmi minung min cinken a hau lo, an party Tazeih kha philh hlah, Cumhning te kha palh lo ding a biapimi a si. Rampi Cozah hruaitu le ramkulh cozah hruaitu thimnak hi a dang tein si sehlaw Vote pektu caah ifiannak a fawi deuh lai i kan Vote te zong man a ngei deuh lai.

Vawikhat pek ah Rampi le Ramkulh Cozah hruaitu pawl cawh in thim a si caah palhnak le tuahsualnak zong a tam deuh lai.

1. Center ah cozah a tlaih khawh lo dingmi party na pek sual ahcun na Vote cu Zero a si lai.
2. Ramkulh ah cozah a tlaih khawh lomi party na pek sual ahcun na Vote cu Zero a si lai.
3. Party a ngei lomi amah te lawng a ummi candidate ah na pek sual ahcun na Vote cu Zero a si lai.

Kawlram cu ram dang he tahchun awk a țha lo, rampi hruainak phung- hrampi a ngei rih lomi ram a si. Atu a ummi cu ralkap uknak phung- hrampi lawng a si.  Atu cu Center cozah nih rampi thatnak le ramkulh cozah thatnak tiang tuanvo lak a si.

Party dang nih ramkulh cozah tlaihnak lam a um rih lo. Cucu ralkap phunghrampi a si. Aho hmanh hrawk khawh a si rih lo. Cucaah tukum kan pek dingmi kan Vote te hi man ngei lomi hmun ‘Zero’ ah kan thlak sual hnga maw? Lungfim buin Vote pek khawh izuam cio usih.

Credit: Laiki Chozah