Hmunthur Char Matupi Le Hakha CNLD Mino An Si Lo Hi, Miphun Dawtu Dawh An Si Cu

Hakha khualipi ah a ummi CNLD mino pawl an cawlhcangh ning cu uar a um hrinhrang ko. An cawlcannak nih mino lung thin chungah miphun dawtnak lungput aa sem ve cang timi a langhter.

Tutan zong Hakha khuathar mino hna tonnak kong le Cinkhua an tlawnnak kong cu an hmanthlak tete hmuh than khawh a si. Cu kong in pehtlaihin CNLD official facebook cahmai a si ve mi Chin National League for Democracy – Hakha-Thantlang ah an cawlcanghnak hmuh than khawh a si. An tialmi cu;

Khuathar Mino He Tonnak Le Cinkhua Tlawnnak: CNLD mino nih 2020 August 13 ah Hakha Khuathar mino he tonnak le Cinkhua ah tlawnnak kan ngei kho. Cinkhua ah mino minung 15 nih kan va tlawn khawh hna.

Hakha Khuathar, CNLD Hakha mino bu dirhnak zong kan ngei kho. Nihin tiang ah Hakha khuapi Sang 12 ah CNLD mino bu kan dirh kho cang. CNLD Thantlang mino zong phu thum ah ithen in an pengtlang an tlawn cuahmah lio a si.

Chin miphun kan ifuntom i “Miphun Covo Kan Lak Than” khawh nakding thazaang a chuahtu mino, a lamkip in a kan dirpi tu nu le pa nan dihlak cung ah kan ilawm. PATHIAN nih kan ram damter in kan miphun thluachuah ko seh. Upatnak he, CNLD Mino, Hakha tiah an tarlangh hi a si.

Hakha CNLD Mino pawl nih hin kan hnu August 8 ni zongah khuachung hmunthur an char hna. Cu kong he pehtlaih in an facebook cahmai ah kan hmuhmi cu;

CNLD Mino, Hakha nih khuachung hmunthur kan char: Chin National League for Democracy (CNLD) in Hakha mino nih 2020 August 8 ah zinglei sml 8:30 in 11:30 am tiang Hakha khuachung ah hmunthur charnak kan ngei.

Minung 100 tluk kan chuak kho. Vomthumaung cerhmun in kan thok i Chin Ramkulh Hluttaw zungpi tiang kan char. Mino hnawmcharnak ah Mask a kan hlutu le din eiawk laksawng a kan petu nu le pa, hawikom nan dihlak cung ah kan ilawm. Nan mintling in kan langhter kho lo.

CNLD thazaang a petu le Chin miphun le Chin ram a dawtu nan dihlak cung ah kan i lawm. Upatnak he, CNLD Mino, Hakha tiah an tarlangh hi a si. Hakha le Thantlang hrawng lawng siloin Matupi CNLD mino pawl zong an cawlhcangh tete a tha ngai ve ti zong in theih a si. August 12 ni ah Matupi khua chungah hmunthur chan in an cawlcangh ve.

Hi ti ning tein an cawlhcanghnak Pathian nih thlua a chuak ko ahcun Chin Miphun nih mah tein khuakhan lairelnak tiang an chuahpi te lai.

Source: CNLD – Hakha-Thantlang