Kachin ramkulh, Hpakant myone, lunghring man sung kawlnak Waikha hmaw khua ah lunghring ngan taktak mi an hmuh tiah People Media nih nihin October 13 ni ah a tarlangh. Cu lunghring pi cu vawlei vawr ah ze-ma-se a kawltu phukhat nih an hmuh ti si.
Cu lunghring tumpi an hmuhnak hmun i kan hnu thla ah vawlei vawr a minnak ruangah minung 200 leng an rak thihnak pawng ah a si ti si. Cu lunghring an hmuhmi cu minung thazaang 100 leng nih an chuah khawh ti si.
Cu lunghring pi cu nizan October 12 chun ah an hmuhmi a si i, Kawlram ngeihmi (Kawlram caah) lak/ting a si lai tiah Lungkhin lunghring kawlnak department in deputy manager U Than Htun nih a chim.
“Nizan zanlei suimilam 1pm hrawngah an hmuh. Nain tu zing lawngah chuak khawhnak lam an ser. Cu lunghring man cu kanmah Lunghring zung phanpi hnu lawngah theih a si te lai. Zung ah a quality kan zoh lai i, experts pawl nih a man an khiah te lai i, a rit zat zong tah a si te lai” tiah U Than Htun nih a chim.
Waikha hmaw ahhin phung ning lo lunghring a kawlmi zong an um i Okchohzi phu, ralkap phu, palik phu le lunghring kawlnak department in tuanvo ngeitu hna nih a thli tein a kawlmi pawl cu an kham tawn hna ti si.
Tutan lunghring an hmuhmi hi tuanvo ngeitu hna kherhhlainak an tuah lio ah ze-ma-se kawltu hna nih an hmuhmi an va hmuh chuah hi a si. Waikha khuami U Kyaw Min nih cun hi lunghring pi hi ton (800) hrawng a si lai tiah a ruahdamhnak a chim.
Ref: People Media, One News Myanmar
Leave a Reply