Hriamnam He Hramhram In Zungkai Ter An Timh Hna Nain Tuni Kha An Hlawh A Tling Lo

By- salai lung thli tum: Hriamnam he hramhram in cozah riantuantu le bank riantuantu riantuanter an timh hna nain tuni kha an hlawh a tling lo. Min Aung Hlaing cu ai hngilh kho ti men lai lo, a lungrawk tuk lai. A ruah leng in mipi nih kan huat timi a thei cang. Atu ning in CDM le lam zawh kan peh khawh ko ahcun tuzarh chung ah result pakhat khat cu a lang hrim ko lai. UN le US nih hriamnam in tlangtlak awk a tha rih lo.

Ralkap nih zawnruahnak ngei loin rammi an kan kah i an kan thah sual lawng ah ramdang nih an tlangtlak duh lai. Atu lio cu ramdang bochan tuk awk a si lo. Yangon ah mipi lam an zawh ning zong ai dang deuh ngai cang, voidang Sule le Hledan deuh lawng ah lam zawh a si nain atu cu ralkap le palik an lor ngam lonak US embassy hmai khi center ah an lak cang, lam zawhtu cu nifatin lampi an khat lengmang ko.

Thawng pang dang relchap: Chin Ramkulh Ngandamnak Riantuantu Pawl Zung Kai Ding in Hnek an Si: Thaizing thawk in zung kai ding in Hakha khuachung in ngandamnak lei rianttuantu pawl an upale nih an hnek hna, tiah thawng kan theih. Chin ramkulh ngandamnak zung zong nih Feb. 15 thawk in zung a kaimi cazin lak ding in nawlpeknak ca an chuah (A tang screenshot).

Matupi ah cun “Kan kai lai lo” tiah CDM a tuahmi ngandamnak lei rianttuantu pawl nih biachahnak an ngei. Hakha ngandamnak lei rianttuantu CDM a tuahmi hna zong biaruahnak an ngeih hnu ah kai le kai lo biachahnak an tuah ve lai, crd- The Chin Journal.