SAC Ralhrang 1 CNDF Sinah Hriamthil He Aa Fonh, Chin ramkulh, Falam peng, Kalay-Falam motor lampi um Hṭin-shoe sakhan ah umhmun khuarmi SAC ralhrang chung in Pyih Phyo Aung (Kum 17) cu September 26 ah Chin National Defence Force(CNDF) sinah hriamthil hna he aa fonh, tiah kan theih. Phyih Phyo Aung nih M1 meithal kuan 345, kut cheh bomb 1, 40 MM bomb 2 hna he CNDF sinah aa rak fonh hi a si, tiah Zalen nih a langhter. “Meithal kaa ken khawhlonak a ruang cu sentari cawngmi lawng meithal an tlaihter hna.
A taangmi dang pawl cu meithal an kan tlaihter lo. A ruang cu meithal he an zaam suallai ti an phan caah a si” tiah CNDF sin aa fonhmi SAC ralhrang chung in Pyih Phyo Aung nih a chim. Amah hi Kalaymyo peng, Thar-si khuami a si i kum 2022, October 15 ah SAC ralhrang nih an tlaih i hramhram in ralhrang ah an luhtermi a si, tiah theih chih a si, crd- Lungmili Post. Thawng dang relchap- Inya Myaing Lam Ah Chungkhar Khuasaknak Inn Kanghnak A Chuak; Kum 90 Pitar Telhchih In Minung 2 An Nunnak Liam.
September 29, zinglei sangah Yangon ramṭhen Inya Myaing lam pawngah chungkhar khuasaknak inn kanghnak a chuah caah kum 90 pitar telhchih in minung 2 an nunnak a liam tiah theih asi. Zing suimilam 10:00 khan meikanghnak aa thok i meikang hi Sanchaung meithattu ralkap, Hlaing, Alon, Kamarut, peng meithattu ralkap phu le chiatṭhat zohkhenhtu phu nih zing suimilam 10:36 tluk khan an thah khawh tiah theih asi.
Nunnak liammi nu 2 hna hi mei nih a kangh hna ruangah silo in meikhu nih a thah hna kum khua lei ah upa ansi caah meikanghnak a chuah khan an lau i zaamnak caan zong an thei loh tiah pawngkam neihniam tualchungmi pakhat nih a chim. Inn kanghnak in nunnak liammi hna ruak hi chiatṭhat zohkhenhtu phu nih Yangon mipi sii-inn pi ah an chiah hna tiah theih asi.
Leave a Reply