India-Myanmar ramri Ngalang khua pawng a cangmi mithah lainawnnak kong he pehtlai in Chinland Defence Force – Zophei nih a tanglei bantukin cathanh an chuah. 2023 March 21 ah India-Myanmar ramri Zophei hmunram Ngalang khua le Mizoram Ainak khua ramri ah a cangmi mithah lainawnnak kong ah CDF – Zophei zong kan lung a ṭha lo. Hi thil cangmi kong ah fak piin kan doh. Tantakmi chungkhar hawikom nan ngaihchiatnak vialte i hrawm in kan in tuarpi hna.
Hi thilcang kong he pehtlai in CDF – Mindat nih cathanh a chuahning ah Magway ramṭhen, Pakokku pengkomh Myaing peng in Ko Jack le Mindat peng in hriamthil puaisa a tuahtu Salai Aung Ling hna cu pehtlaihnak an ngei tiah fiang tein kan theih. Kan hmunhma chung ah tuksapur sualnak a tuahtu hna cu tlaih in upadi he aa tlak in hmalaknak tuah an si lai.
Kanmah CDF-Zophei zong nih thahnawnnak a cannak hmunhma le a pawngkam hrawng ah kal in chekhlatnak kan tuah, leilawng pakhat cu Ngalang khua ramri Bawinu tiva kalnak lamthlang ah kan hmuh. Leilawng hi tutan thilcang kong he pehtlaihnak a ngeimi a si ahcun a ngeitu sin ah pek ṭhan ding in timhtuahnak kan ngei. Atu bantuk ngaihchiat lungfahnak hmailei ah kan ton ti nakhnga lo mizapi hmanmi lampi,
Cu kaphnih i pehtlaihnak a ṭhatnak hnga ding caah, tualchung biaknak lei phu le Humanitarian Organization phufonh nih kan zohkhenh lai tiah CDF-Zophei nih March 31 ah cathanh a chuah.crd-the chin post. Thawng dang: SAC Nih Nawlngeihnak An Laak Ruang Ah Vawleicung Minthang Mark & Spencer Le Japan Uniqlo Company Nih Myanmar Ram An Chuahtak Cang. SAC nih nawlngeihnak an laak ruang ah vawleicung mithang Mark & Spencer Company le Japan Fashion Uniqlo Company cu hmakhatte ah Myanmar ram an chuahtak cang, tiah theih a si.
Hruk-aih le eidin thilri a zuartu vawleicung minthang Britist Company Mark & Spencer cu SAC nih, nawlngeihnak an laak hnu in Myanmar ah nuhrin covo buarnak a tam tuk caah Myanmar ram kan chuahtak cang lai tiin nikum ah thanhnak an rak tuah bantukin 2023 March thla ah Myanmar ram an chuahtak cang, theih a si. Ramdang Company a si i Myanmar ram ah hram a bunhmi H & M | C & A | Primark | Aldi South Group le Tesco Company hna zong Myanmar ram an rak chuahtak cang tiah theih a si.
Ramkip Energy Technologies Institute (Eti) thanhca nih an chuahmi ah Myanmar ram dirhmun cu rianṭuantu hna an caan sunglawi zong ṭha tein an hmang kho lo. Ramkip ah rian a ṭuan kho dingmi rianṭuantu hna ca zong ah ruahchannak a tlawm tuk cang tiin an langhter hnu ah ramdang Company tampi nih Myanmar ram an chuahtak, tiah theih a si. Cu ṭhiamṭhiam in vawleicung ram tampi ah a lar ngaimi Japan Fashion Company Uniqlo zong Myanmar ram ah nuhrin covo buarnak a tam tuk caah Myanmar ram kan chuahtaak cang tiah cathanh an chuah.crd-the chin post.
Leave a Reply