Ramri lam sersiamnak tawlreltu Border Roads Organisation(BRO) he ramri hauhruang kulhnak kong cu September 23 ah kan ceih i India-Myanmar ramri hau kulh dingin kan hna a tla, tiah Manipur Chief Minister N Biren Singh nih social media X(twitter) ah a ṭial. Manipur Chief Minister N Biren Singh nih cun, Myanmar ram in phungning loin India ram a lutmi hna le rithaisii phorhnak a tam tuk cang caah ramri ṭha tein venhim a herh kong a chim.
Myanmar ramri kulh ding kong ceihhmainak ah hin Manipur Chief Minister N Biren Singh, DGP, Chief Secretary le Home Department in Official hna zong an kai. Manipur State le Myanmar ramri hi 398 km in aa tlai i, cu chung ah 6 km hrawng lawng aa kulh. Atutan ah hin Manipur le Myanmar ramri 70 km hrawng kulh ding in ceihmainak an ngei, tiah The Telegraph nih an ṭial. SAC nih nawlngeihnak an laak hnu in Myanmar mi zeimawzat cu India ram ah an zaam hna i.
Manipur ramkulh chung ah Myanmar mi 5,000 leng an phan. Cu chung ah minung 70 leng tlaih an tong, tiah India For Myanmar phu nih an chim. Meitei miphun le Kuki-Chin kar buainak zong hi Myanmar ram in a lutmi hna ruangah a si tiin ramkulh cozah nih a zumh ruangah Myanmar ralzam mi hna cu ramri ah harnak an tong ngaingai, tiah ralzaam bawmchantu hna nih an chim. “Myanmar lei in phungning lo a lut mi an karh pinah, rithaisii le smugling zong a karh.
Curuangah kan ramri kulh hi a herh tuk mi a si,” tiah Biren Singh nih cun a chim, crd- The Chin Post. Thawng dang relchap- Saṭil Zuva Ca Ah Falam Peng Parte Khua Mi Hna Nih Ruah Ti Khonnak Khor An Cawh, Chin ramkulh, Falam peng, Parte khua ah August 26 in Parte khuami nih an rak cawhmi ruah ti khonnak khor cu September 24 ah a dihlak in an lim cang, tiah Zalen nih a ṭial.
Saṭil zuva nih ṭhal caan ah tlanh ding an ngeih khawh nakhnga Salai Aung Myint nih online ah mipi bawmhhalnak a rak tuah i, hleihlak bantuk muisam a ngeimi ruah ti khonnak khor cu khuami hna bawmhnak in an cawh khawh, tiah theih a si. Ruah ti khonnak khor a cotu hi Parte khua mi mino 30 leng an si i zarhteni fatin an cawh tawn. Thla khat chung ah an lim khawh, tiah Zalen nih cun a langhter.”Zarhteni fatin te mino nih an cawh lengmang caah an lim.
Cu pinah hi rian ṭuan chuah khawh a si nakhnga a tawlreltu Salai Aung Myint cung zong ah kan i lawm tuk. Ṭhal caan ah saṭil le zuva hna ca ah ti a har ti lai lo. Kum saupi ca ah thawpat le hai zong kan cin lai,” tiah khuami pakhat nih a chim. Ruah ti khonnak khor hi a thuh pe khat le cheu, a sau pe 100 a si i cheukhat khor cu pe 60, 50 tluk tiang an cawh. Khor a cawhmi dihlak hi khor 28 a si. Khor an cawhmi a vang hi pe 10, 30 tiang a kau, tiah Zalen nih a ṭial.
Leave a Reply