India Ram Ah Cun Kut Thuhmi Sanitizer Ruangah Minung Tam Tuk An Thi Cang

Chaklei India ram ahcun Covid-19 runvennak ca i tuahmi lockdown chungah zuu dawr tiang khar a si caah zuu aa telmi kut thuh (Hand sanitizer) an din caah minung 10 an thi cang tiah kan hnu July 31 ni ah police hna nih an phuan.

Andra Pradesh state, Kurichedu khuapi ah Alcohol based Hand Gel (sanitizer) an din i an thih hi a si. India ram ah Covid-19 mizaw an karh ning hi nitin an tam tuk caah mizaw dihlak hi 1.6 million leng an si cang tiah theih a si.

“Micheukhat cu zuu nih a suai tuk cang hna caah rit duh ah alcohal based hand gel (Sanitizer) an din, lockdown a si caah zuu dawr cu khar si kaw an i caw kho ti lo. Nain sanitizer cu fawi tein cawk khawh a si” tiah Kurichedu khuapi ah a ummi district police officer Siddhartth Kaushal nih Reuters ah a chimh hi a si.

Hand sanitizer a dinmi a dang cheukhat cu siizung ah an thlawp i an dam cang. Hand Sanitizer din ruang i a thimi hna lakah cheukhat cu zawtnak a rak ngeisami an si tiah Siddharth Kaushal nih a chim chih. Atu hi India center cozah nih harnak tlawmpal tal a chanhchuah khawh deuh hnga maw tiah chawlehthalnak tam deuh an on than cang ti si.

Andra Pradesh state telh inn state tampi ah zawtnak a karh tuk caah lockdown tuah lio a si rih. Kurichedu khuapi zong cu biatak tein lockdown tuah a si. Chin ralzam tampi umnak Delhi khualipi zong ah lockdown tuah rih a si.

India ram ahhin nikhat suimilam 24 chungah zawtnak a ngeimi case thar 50000 (thong sawmnga) tiang hna an kar tawn. Nihin tiang a zawmi dihlak hi 1.75 million leng an si cang i a thimi dihlak hi 37,364 an si cang tiah theih a si.

Ref: PPL

Leave a Reply

Your email address will not be published. Required fields are marked *