Hamas-Israel Kahdonak A Fak, Kaphnih A Thi Mi An Tam, October 7, nirukni zinglei ah Palestine ram i ralhrangphu a si mi Hamas nih Israel cu rocket missile a thong leng in an kah i Israel zong nih lehrulh kahnak a tuah colh ve caah kahdohnak a fak chin lengmang. Hamas nih an kahnak ruangah Israel rammi a thi mi 300 renglo an si cang i hliam a tuar mi a thong an tling. Cu bantukin Israel nih lehrulh kahnak a tuah mi ruangah Palestine rammi 230 leng an thi i 1,600 renglo hliam an tuar ve tiah Palestine ngandamnak lei nih an thanh.
Hamas ralkap hna cu Israel ramchung hmun 20 hrawngah an lut i Israel rammi cheukhat an tlaih hna tiah theih a si. Hamas nih Judah biaknak caah ulhni (Sabbath ni) theng ah Israel a kah i mipi tampi an thih mi kongah US President telh in ram hruaitu tampi nih Hamas le Palestine cozah mawhchiatnak bia an chim. Hamas nih an kah lecangka in Israel PM Benjamin Netanyahu lakhruak meṭing a auh colh i “Ral kan tho cang, ral chung ah kan um cang” tiah vawleipi theih in a chim.
Cu lioah Iran cozah nih cun Hamas thiltuah mi kong ah conglawmhnak bia a chim i mipi zeimawzat zong nih lamzawh in an lungtlinnak an langhter ve. thawng dang relchap- Chin ramkulh chaklei Tedim peng ah nizan October 7 ah nupi hal ding in a kal mi hna motor cu aa let i motor chung cuang mi minung 6 nunnak a liam. Thalmaul khua in Tedim khua ah nupi hal dingin a kal mi motor cu a kir lei ah aa let i, motor khaltu telh in motor aa cit mi dihlak nunnak a liam dih, tiah tualchung mi hna nih Zalen ah an chim.
Tlangval pa chungkhat hna nih a nungak nu chungkhar hna cu nupi ca ah va hal dingin an kal i an kir lei, khua a muih cang hnu ah motor cu horkuang ah a tla,” tiah tualchung mi pakhat nih a chim. Aa ṭhi-um ding hi nihin October 8 ah Malaysia ram EBC KL Biakinn ah ṭhitumnak tuah ding an si, tiah a chim chap. Atu bantuk in chiat an ton ruangah an i ṭhitumnak puai zong an ṭhulh rih, tiah theih a si, crd- The Chin Post.
Leave a Reply