Hamas-Israel tukdohnak cu pehtlai in a kal rih i a thi mi zong an karh ngaingai. Kaphnih in a thi mi 1,600 leng an si cang. October 10 ah Israel cunglei kahnak in Hamas hruaitu pahnih an thi tiah Israel Defense Force nih an thanh. Cu hna cu Joad Abu Shmalah le Zachariah Abu Ma’amar an si. Joad Abu Shmalah hi Hamas i Minister of Economy a si i Zachariah Abu Ma’amar hi Political Bureau ah chungtel le Internal Relations tlaitu a si. Gaza le Israel ramri ah Hamas ralhrang ruak 1,500 an hmuh tiah NBC News nih a ṭial.
Atu tiang ah Israel lei a thi mi 900 hrawng an si cang i cu chung ah US rammi 11 an i tel tiah President Biden nih a chim. Hamas nih tlaih mi hna chung ah US rammi an i tel kho men tiah zumh a si fawn. Palestine’s Ministry of Health nih cun Gaza lei a thi mi a tlawmbik 830 an si lai tiah a thanh ve. Gaza Strip cu mengkulh 140 hrawng lawng a kau mi a si nain a chung ah milu nuai 2 renglo an um. Israel nih biatak tein a vun kah tikah Gaza khuapi hmun tam deuh cu a ciam.
A chung a um mi hna nih Gaza ah cun i thuhnak hmun a um ti lo ti tiangin an chim tiah Fox News nih a ṭial. Thawng dang relchap- Laiza Khua Pawng Ralhrial Camp Cu SAC Ralkap Nih Bomb An Thlak I Minung 30 Deng An Nunnak Liam, KIO/KIA headquarters a umnak Laiza khuapi um Munglaikhat ralhrial camp cu SAC ralkap nih zahan October 9 zan suimilam 11:00 luan ah bomb a thlak i ralhrial minung 29 an nunnak a liam, tiah KIO/KIA chimphuannak nawlngeitu Colonel Naw Bu nih RFA ah a chim.
Nunnak a liammi lakah kum tling lo ngakchia 10 an i tel i hliam tuarmi 56 an phan. SAC ralkap sakhan in Laiza lei kap ah hriamngan an kah tawn nain atutan bomb thlakmi hi drone in an thlakmi a si kho, tiah Colonel Naw Bu nih cun a chim. “Hriamngan in an kahmi cu a si hrimhrim lo. Vanlawng asiloah drone in bomb an thlakmi a si. Vanlawng a si cun a thawng kan theih ding a si. Atutan SAC ralkap nih bomb an thlakmi hi cu drone zumh bik a si ko. Bomb an thlakmi a min zong hngalh a si rih lo.
Nunnak a liammi hna an ruak kan kawl cuahmah hna,” tiah Colonel Naw Bu nih cun a chim. Cu bomb thlaknak kong ah RFA nih Kachin ramkulh chimphuannak nawlngeitu Win Ye Htun cu biahalnak an tuah i keimah pumpak nih zeihmanh ka hngalhmi a um rih lo, tiah a leh hna. SAC ralkap nih bomb an thlaknak hmun hi Laiza khuapi he meng 2 lawng aa hlat i ralhrial an umnak khua a si.
Hliamhma a pumi hna cu Laiza khuapi sii-inn ah an tlikpi hna i thlopbulnak an tuah hna. A thimi le hliamhma pumi zong fiang tein kan hlathlai cuahmah, tiah RFA nih a langhter. SAC ralkap nih bomb thlak ruangah ralhrial nunnak a liammi hi ngakchia 13 telh in minung 32 an si, tiah Khit Thit Media nih cun a langhter.
Leave a Reply