Vawlei cung minthang actor Jackie Chan nih Kawlram, Irrawaddy tiva chung i a ummi Dolphin pawl tha tein zohkhenh ding ah Kawl holh tein Kawl pawl a nawl hna. A tang ah a video in tar chih a si.
Jackie Chan nih a chimmi cu “Hello, nan dam maw? Keimah cu Jackie Chan ka si. Zaangfahnak tein seh in nga tlaih (to stop electronic fishing) ti lo ding in ka bawm uh. Irrawaddy Dolphin pawl hi tha tein nan kilven hrimhrim awk a si. Zaangfah tein electro-fishing ngolnak in ka bawm uh.”
“Vawlei cung ngakchia hna bantukin Dolphin fa tete hi an nunnak caantha pe ve uh. A rauhhlan ah Kawlram ka rak tlawng lai i Dolphin pawl ka hmuh lai tiah ruahchanhnak ka ngei. Keimah cu Jackie Chan ka si. Kaa lawm tuk!” tiah a chim hi a si.
Electro-fishing in nga an tlaih caah Dolphin pawl an thi hi a si. Dolphin cu fahrin a har ngaimi a si. A caan zong a rau fawn. Atu Irrawaddy Dolphin fa tete a thimi hi 6 a si cang ti si.
A poi khunnak cu fahrintu Dolphin pi a thih ve hi a si. Cucaah fa ngeih than ding a rau tuk cang lai. Irrawaddy Dolphin pawl cu ti tha ah a ummi vawlei cung ah a tlawmmi phun an si i Kawlram chung dihlak ah 70 hrawng lawng a um cang ti si.
Fur lio ti lianh ruangah hmuh than khawh ti lomi zong an um ti si. A zual khunmi cu dynamo nga tlaihnak ruangah a si. COVID-19 pulrai a um hlan ahcun tourists pawl an ra i an tilawng tete an hman piak caah phaisa hmuhnak an ngei i nga an tlai lo.
Atu tourists pawl an phan kho lo hnuah nga an tlaih i dophin zong an thah dih deng ti si. Cu ruangah vawlei cung minthang Jackie Chan nih Kawl pawl cu dynamo nga tlaihnak in dolphin thah ti lo ding in nawlnak a tuah hi a si. A tangah a video zoh ding tar chih a si.
https://www.facebook.com/111098167341968/videos/865352650656250/
Ref: TTL; Video: Ice Cold
Leave a Reply