By-Chelsa Bawi:Japan nih a mahtein a um ko mi US a rak kah. Culo i Japan an bawipa Isoroku Yamamoto nih a rak chimmi bia nih ni hin tiang vawlei a tlirh dih! English; “I fear all we have done is to awaken a sleeping giant and fill him with a terrible resolve.
Chin; “Kan thiltuahmi vialte nih hin ai hngilhmi pawpi an hlauh sual i thalo in biachahnak an tuahter sual lai ti lawng ka phang.” Ai hngilh mi pawpi (US) cu an thangh sual taktak i Japan cu vutcam ah a cang dih taktak. Cubantuk in ralhrang hna nih ai hngilhmi pawpi (Chinmi) an lam hlauh sual ve taktak cang i ralhrang cu vutcam ah an canter cuahmah cang hna.
Ca dang a ttial mi relchap; Thaizing Ah Cun Khua Adei Te Ko Lai, Ralhrang hna ruangah lai hlum kan unau hna temtuarnak le harsatnak hi celh ding asi lo. A chinchap lo ah furpi faruahthawh lio asi, COVID nih dangkhat in a vun phak zuahmah hna, an temtuarnak ruah ah van zoh ah a saang lei zoh ah a pit ko.
Sihmanhsehlaw kan tuarnak pinlei ah Kawl nih Chin miphun i rem lo dingin “divide and rule” ngian kum caan saupi a hman mi cu lungrualnak le tanttinak mei a kan kaupiak diam. Japan nih a herh lomi Pearl Harbor US ai kah sual i US ralkap 2,403 an rak thihnak nih American mipi thinlung ah faktuk in lungrualnak,
Japan tuk duhnak thinlung a ngeihter viar ciammam hna i Japanese Imperial Isoroku Yamamoto cu faktuk in a rak sunghnak a rak si diam. Ralhrang hna nih nihin ah a kan hremnak hi Chin miphun lungrualnak caah thlaci an tuh cuahmah bantuk asi ve. Chin miphun kan tuanbia ah tu bantuk in kan i lungrual hi a um rih lo.
Salm 30: 5 nih “Zaan ah mitthli tlaknak um hman sehlaw zinglei ahcun lawmhnak a ra than ve” a ti bangin tu ah tap ko hna usihlaw zing niceu dawh sin ah khin nih caan kan phan ve deng cang, khuadei lai ahcun a muih a zual khun an ti bangin Dawtmi miphun hawi hna thaizing kan phan dengmang cang, khuadei dengmang cang, lungsau thinfual tein le him bawm tein thaizing cu hngak ko rih hna usih.
Leave a Reply