Joshua Van le Filipe Bunes An I Phomh Cang Lai

Chin MMA arfi, UFC fighter Joshua Van cu thaizing January 14 zinglei ah Brazil mi Filipe Bunes he an i phomh cang lai. Thaizing ah tuah ding mi UFC Vegas 84 hi 2024 kum chung ah UFC puai hmasa bik ding a si i, Joshua Van le Filipe Bunes hi preliminary card, a hmasa bik puai onnak an i celh lai. Joshua Van hi UFC a luh hnu in voihnih aa celh cang i, teinak a hmu veve rih. Tutan ah aa celhpi ding mi Filipe Bunes hi UFC ah aa celh voikhatnak ding a si nain MMA ah hmuhton tampi a ngei cang.

MMA aa celhnak record hi 13-6-0 a si i, a sullam cu voi 13 teinak a hmuh lio ah voi 6 a sung ve cang tinak a si. Brazilian Jiu-Jitsu(tlaihkhih) cu a thiam phun a si. Joshua Van MMA record hi 9-1-0 a si i, a sullam cu voi 10 aa celh ah voi 1 a sung ve cang tinak a si. Joshua hi “cucu a thiam bik” tiah chim ding a um lo nain striking a thiam pinah tlaihkhih zong a thiam ṭhiamṭhiam. Wrestling thiam tiah theih mi Zhumagulov lak zong ah teinak a rak hmu cang. MMA lei a hngal mi nih Freestyle fighter ṭha ngai a si, tiah an chim.

Joshua hi a luancia December thla ah i celh ding a si nain damlo zawtfah ruangah aa celh ṭhan khawh lonak kong media ah a chim. Atutan aa celhpi ding hi round hnihnak ah tei dingin timhlamhnak a ngeih kong zong a chimchap. Joshua le Filipe hi puai hmasa bik a si lai caah tuante ah an thawk lai i, Myanmar caan in Zarhpini zinglei suimilam 3:30(India 2:30) hrawng ah an thawk te lai. Preliminary card hi India lei UFC zohnak bik Sony Liv ah cun live in an pek lo caah zoh khawh a si lai lo nain ESPN+ subscribe a tuah mi ca ah zoh khawh a si lai.

Thawng dang relchap- Caan Karlak Kahdaih Hnatlaknak An Ngeih Ni Hnih Hnu Ah SAC Ralkap Le TNLA Kar Kahdohnak A Chuak, Caan karlak kahdohnak ngawl ding in kaphnih kar kahdaih hnatlaknak a ngei mi SAC ralkap le Ta’ang ralkap TNLA cu nihin January 13 zinglei ah Shan ramkulh chaklei Kyaukme khuapi pawng ah fak ngaiin an i kap, tiah tualchung mi nih an chim.

SAC ralkap le chaklei hriamtlai phu unau thum cu China cozah tawlrelnak in January 11 ni ah kaphnih hnathlaknak in caan karlak kahdohnak daihter ding in bia an rak khiah nain ni hnih a rauh hnu ah fak ngaiin kaphnih kar kahdohnak a chuak ṭhan. “Nihin January 13, zinglei tuante ah Kyaukme khuapi pawng ah an i kap i hriamngan zong an hman, vanlawng belte cu a ra lo. Kahdohnak a dih rih lo caah thil cang kong cu chim awk a ṭha rih lo.

Kyaukme khuapi tualchung mi cheukhat cu kahdohnak ruang ah a zaam mi zong an um nain a cheu cu khuapi chung ah an i thupnawk hna” tiah tualchung mi pakhat nih a chim. Nizan January 12 ah SAC ralkap nih Kyaukme peng Parpoke khua ah hriamngan voi hnih an kah i Lashio, Namhsan, Namtu, Hsipaw peng zong ah SAC ralkap nih hriamngan le raltuknak vanlawng in kahdohnak an tuah, tiah chaklei hriamtlai phu unau thum nih an thanh.

Leave a Comment

Leave a Reply

Your email address will not be published. Required fields are marked *