Ko Si Thu Phyoe cu kan hnu Hpakant lunghring kawlnak i leivawr minhnak ah a luatmi pa a si. Amah cu leivawr minhnak ah lung nih a tai a tlak hnawh caah cawl kho tuk loin a um lio a si.
A tai fak kong a chimmi cu, “A daih deuh caan, ni khua a chia deuh caan ahhin ka tai a fak khun i sau deuh ka thu ahcun a fak, cun zan ahhin a ka thanhtu seh bantukin suimilam pakhat hrawng ka it ahcun phun dang in a fak” tiah a inn ah a va lenmi BBC thawnglatu sinah a chim.
“Hi tin tai fak peng in um nung ding cu ka tih ko, zeihmanh tuah khomi ka ngei ti lo. Ka hawile sinah ka thih ve lo cu sual bantukin kaa ruat” tiah a vanchiatnak kong a chim hi asi.
Amah hi Hpakant i Waikha hmaw ah rian a ttuanmi a si i kan hnu July 2 ni ah leivawr minhnak in minung 170 leng an thih i minung 56 hliamhma a tuarmi hna lakah aa tel ve mi a si.
“Hpakant ah hin tu bantuk thih a um lengmang i tuan deuh lio ahcun tu bantukin online internet a um lo caah mipi nih an theih kho tawn lo. Cu lio ahcun mah mithi cu mah nih vuih a si. An ruak hmuhmi cu vui i an ruah hmuh lomi cu cu ticun an tlau thai ko” tiah tutan leivawr minhnak ah aa tel vemi Ko Si Thu Phyo nih a chim.
Leivawr a minh hnu nikhat ah cozah lei in Ministry of Natural Resources and Environmental Conservation Vuanci U Uhn Win hruaimi hlathlaitu committee an dirh colh i hlathlainak an tuah. Leivawr a minhnak Waikha hmaw tiang tha tein hlathlainak an tuah i an hruaitu Vuanci U Uhn Win nih a chimmi cu leivawr a minh hi pehzulh in rua a sur caah a si i a thimi hna hi an duhham tuk ruangah an thimi a si tiah a chim.
Cu pinah State Counselor DASSK zong nih “A thimi hna chung in phung ning loin lunghring a kawlmi tampi an i tel i cucu phung ning tein rian hmuh a har timi langhtertu a si” tiah a chim ve.
Cu kongah hliam tuar Moenyein University ah Burmese in Degree a la cangmi, leivawr minhnak ah aa tel ve i a lu ah hliamhma fak a tuar ve mi Ko Yan Myo Aung nih cun “Cunglei nawl ngeitu hna nih cu bantukin an chimh cu ka lung tha lo. Ngaihchiat in kan um lio caan ah cu bantukin an chim tikah kan lung fak chinchin. Chungkhar pacem, a unau, innchungkhar ning in a thimi zong an um. Rat in thazaang peknak bia zong an chimh ahcun a tha ngai hnga. Cu ti si loin duhhamnak ruangah an thi ti cu lung a tha hrim lo” tiah a chim ve.
Ref: BBC
Leave a Reply