Kalay PDF Ralkap 2 Hna Cu SAC Ralkap Nih An Tlaih Hna Hnu Ah An Thah Hna

Kalaymyo peng, Doewaichaung khuapawng SAC ralkap nih December 4, chunhnu suimilam 1:00 hrawng ah lam aa chawkmi cu checkhlatnak an tuah hna, cu lio ah PDF-Kalay ralkap 2 cu an tlaih hna hnu ah an thah hna tiah theih a si. SAC ralkap lei thawngthanhnak nih cun, lunghrinhmi cycle 1 kan hmuh i checkhlatnak tuah ding in dirter a si nain, dirlo in an zaam caah kan kah hna, PDF ralkap 2 ruak le pistol 1 kan lak tiah an langhter.

Mit hmutu pakhat nih cun ” an zaam caah an kahmi hna a si lo, an ruak zong buri chung ah an chiah hna hnu ah motor chung ah an khumh hna” tiah a chim. Thah a tongmi PDF ralkap 2 chung ah pakhat cu Khuppi tiah auhmi a si i, a ruak zong a chungkhar nih an la kho rihlo tiah theih a si. Thawng dang: Kachin Baptist Church( KBC) Hruaitu Dr.Taklam Samson Cu SAC Ralkap Nih An Tlaih.

Kachin Baptist Church(KBC) Chairman hlun Dr.Taklam Samson cu SAC ralkap nih, nizan December 4 ah Myintgyina in Mandalay a kal lio vanlawng bual ah an tlaih, tiah theih a si. KBC pastor pakhat zong nih, “SAC nih an tlaihmi cu a si ko. An tlaihnak a ruang cu fiang in kan hngal rih lo. SAC ralkap le KIA kar kahdohnak a zual caah hro le cer in an tlaih hi a si ko lai,” tiah a chim.

Dr.Taklam Samson cu a luancia 2019 June thla lioah Donald Trump he Inn Raang pi( White House) ah tonnak an rak ngei i, Donald Trump sinah a rak chimmi bia ruangah dantat dingin Northern Command in SAC ralbawi pakhat nih biaceih zung ah a rak chuahpi. Donald Trump he an rak i ton lioah Dr.Taklam Samson nih, Kachin ram kahdohnak a fah ning le Khrihfa mi hna tang thlak an tonnak kong a rak chim.

Cu kong he pehtlai in Dr.Taklam Samson le Min Aung Hlaing cu Mandalay ah tonbiaruahnak an rak ngei i, rualremnak an rak ser khawh. Donald Trump he an rak i ton lio i a chimmi kong he pehtlai in Min Aung Hlaing he tonnak an ngei i rualremnak an rak ser khawh ṭhan ko. Asinain atu tan an tlaihnak a ruang hi hngalh fian a har ngaingai. An chuah ṭhan te lai maw thong dik an thlak te lai ti cu hngah a hau rih ko, tiah Kachin mi hna sinin theih a si.

KBC Chairman hlun Dr.Taklam Samson cu Kachin mi hna ca ah rumra a ngeimi le thil ti kho ngaingai mi hruaitu pakhat a si, tiah theih a si. Rev. Dr. Hkalam Samson cu nihin December 5 ah an thlah ṭhan cang. Thailand ram Bangkok ah a hawile he meeting kai ding in timhtuahnak an ngei i, SAC ralkap nih ramdang chuahnak nawl an pe lo, tiah theih a si.crd-the chin post

Leave a Reply

Your email address will not be published. Required fields are marked *