Kahdohnak ruang ah Rakhine ramkulh, Ann myone in an zam i Pago ramthen, Intakaw myone, Hteenan Kokka khua a phanmi Chin miphun ralzam minung 50 hrawng cu a rannak in bawmh an herh tiah anmah bawmhnak riantuantu phu sin in theih a si.
Hteenan Kokka khua a phanmi kan unau Chin ralzam hna cu RRCCI timi ralzam bawmhchanhtu phu nih lawlawse an umnak thlam saknak caah phaisa an bawmh nain an ei din ding le ngandamnak lei a herhmi sii le thilri le siangngakchia 20 hrawng caah fimcawnnak harnak an tong tiah theih a si. Myanmar Now nih a tarlangh.
Naupawimi hna caah a ngandamnak zohkhenhnak pawl, bawmhnak tampi an herh ko. Kan chimh ko ahcun bel le kheng tiang in zeihmanh an ngei lo tiah Chin Humanitarian Aid Group secretary Salai Win Maung nih a chim.
Rakhine ramkulh, Ann myone, Mingaladon khua in ralzammi kum 21 minu Ma Yin Hla hi thlathum naupawi a si i an khua ah nau ngeih a duhmi a si. Kan khua a dai ahcun kan khua lawngah kir than ka duh. Hi ka hin cun tuan ding rian a um lo. Kanmah khua ahcun tuan ding rian zong a um tiah Ma Yin Hla nih a chim chih.
Kan lo riantuannak ah cozah ralkap nih an kan phit piak hna pinah kan khua pawng i hriam ngan kuan a tla peng caah tu bantukin kan zammi a si tiah Ma Yin Hla nih a chim nolh.
“Ek in zong um lo, ei din ding zong um lo. Inn zong um lo i a zeizong vialte a chambau dih. Hi ti dur tete zong hi midang nih an kan bawmhmi lawng a si. Zeihmanh khi kan ngei lo. Khi ka le Rakhine le ralkap an i doh caah kan tih i kan rak zam. Meithal kuan zong khua chung a tla. Bomb zong a tla, Ann myo hmanh ah kan um ngam lo. Kan tih caah hi ka hin kan phan tiah Rakhine ramkulh, Ann myone, Mingaldon khua in a rak zammi Daw Khin Aye nih aa chim.
Rakhine ramkulh le tlanglei Chin ramkulh i kahdohnak ruangah Rakhine ramkulh chungah a ummi Myo miphun ralzam 500 leng cu nikum December thla ahkhan Hleku myone, Weh-inn-paok khua ah ral an zam hna. Cun Chin ramkulh Palehwa myone in Khumi Chin miphun minung 150 hrawng hna zong Hmawbi myone chungah kan hnu April thla ahkhan ralzam in an phan ve.
Yangon hrambunh Chin Humanitarian Aid sin in a hnubik thawngpang theih ning ah Ann myone, Dalehchaung khua oksu in ral a zammi Chin miphun dihlak hi 4500 hrawng an si i Rakhine ramkulh, Ann myone le Magwe ramthen, Yangon ramthen hna ah lawlawse an i dor chun tiah theih a si.
https://www.facebook.com/keysknowledge/videos/2646220742257816/
Ref: MMN; Video: RFA
Leave a Reply