Kan farnu Sui Hlei Tial ruak fimtawlnak kong cu vawlei cung Laimi lawng siloin a theimi vialte ti awk in kan ngaihchiat pi cio. Cu tuarpitu hna lakah biazai a tialmi hna nih biazai in an tuarpinak an tial i, muitawn a thiammi nih muitawn in an tuarpinak an langhter ve. Cu lawng siloin hlaphan thiam nih hla in a phan ve.
Kan farnu Sui Hlei Tial cu Evan. Van Biak Tluang nih a tuarpi tuk ve caah a tuanbia hmun ding in hla in a phuah. Cu hla cu hlasak thiam le awtha Bawi Thiang Bik nih a sa. Cu kong he pehtlaih in Bawi Thiang Bik nih cawngianak video tawi (Chorus lawng) cu mipi hmuh in a tar i atanglei bantukin caption a tial chih.
“Evan. Van Biak Tluang nih kan dawt kan far Leng Sui Hlei Tial i a kan liam taak ruangah a tuarnak le zaihla in a hlawinak a langhtermi Chorus te ka van chiah chung. A phuahtu ‘Halleluiah Biak’ timi fb ah a tlingin zoh khawh a si lai. Kan tuarnak le kan ngeihchiatnak hmurkaa nih chimphuan ding a tlinh lo, zai hla in kan rak langhter ve,” tiah a tial hi asi.
Atang ah video tawi zoh ding kan tarpiak chin hna.
https://www.facebook.com/bawithiang.bik/videos/979926075822753/
Video: Bawi Thiang Bik
Rel chih ding;
An Kan Liamtakmi Kan Nau Sui Hlei Tial Kongah Thantlang Nawlngeitu Nih Ngaihthiam Halnak An Tuah Ah A Ttha, Tiah Ka Ruah: by Cacungbik Tlumang
A chimrel cangmi zong an um men ko lai nain ka lungah a um tuk ve caah ka phuanmi a si. Laimi cu mitlawmte kan si; pakhat le pakhat ai naihniammi le khua khat le khua khat zong ai sengtlaimi, ‘mi le mauhram’ ti bantuk lawngte kan si hna caah thih le loh kan ton tikah a fahsak khunmi miphun kan si.
Mah khua le mah inn le lo ah siloin mi khua le ramdang ah thihlohnak kan ton tikah an kan runh khun fawn. Thih ciocio zongah no lio le chan lingching lio thihnak hi a fak khunmi a lo fawn.
Tutan hibantuk thil kan tonmi nih ramchung lawng siloin vawlei kil li khuasa Laimi dihlak kan lung an runh dih, ti u sihlaw kan palh lai ka zum lo. Ngaihchiami chungkhar kan tuarpi dih hna. Hi kong hi caan nih a liampi te ko lai nain Laimi thinlungah cun fawi le bai ai hnawt kho ti lo ding tuanbia pakhat a si.
Cucacun, kan Laimi dirhmun le sining lawng siloin vawleicung phung le phai zong a simi: “Ngaihthiam Halnak” hi Thantlang COVID-19 Community upa le Khuabawi hna nih an tuah ah a ttha, tiah ka ruah.
COVID-19 upa hi kawl deuh an si i, an duh lo hmanh ah Laimi chungin a telmi upa hna le Khuabawi nihcun an tuah ah a ttha, ka ti. Cucu, Laimi kan sinak kan nunphung pakhat bak a si ve. A taktak tiah cun lainawng le khuasual a purmi hmanh ngaihthiam halnak in i ngaihthiam si tawn ko.
Hi thil hi khirh awk a tthat ti lo caah remnak le daihnak kan tuah khawhmi cu ngaihthiam i hal lawng a si ko. Kawl bawi le nawlngeitu si vemi Khuabawi hna hi an rian in dinhter si hmanh hna sehlaw an tuahsernak hi zeitikhmanh ah philh awk a tthami a si lo. An rian kong le dantatnak kong kha chim duhmi a si lo.
Ngaihthiam hal hi mifim le khuaruat kho nihcun an i harh hrimhrim lo; hawilo lo le khuaruat kho lo tu nih kan i harh deuhmi tu a si. Khuabuai Pu Tum Bik chimnak ah, “hi ruak fimtawlnak kongkau ahhin Khuabawi an biapitnak a lang ngai ko.
Ngaihchiami chungkhar sinah ngaihthiam halnak hi um kho sehlaw, Laimi dihlak theih khawh dingin cathanhnak zong tuah si sehlaw Laimi thinlung hi a dam ko hnga lo maw, tihi ruah awk a um ngai.
Hi tluk Laimi nih buaipimi kongah zeihmanh ngaihthiam halnak a um lo tu ahcun mi thinlung ah zungzal in a hmunmi ngaihchiatnak ah a cang khomi a si. Keimah pumpak ruahnak!
Credit: Cacungbik Tlumang
Leave a Reply