Kanan Pah-Kah- Phah Nih CNO/CNDF Chungtel Pakhat An Kah

Sagaing ramṭhen, Tamu peng chung NUG kuttang um hriamtlai phu Kanan Pah-Kah- Phah pawl nih nizan January 31 ah CNO/CNDF Information and Public Relations ah Secretary a ṭuan lio mi Salai Bawi Bawi cu a kah i a hmun ah a nunnak a liam, tiah theih a si. Salai Bawi Bawi le CNO/CNDF ṭuanvo ngei pakhat cu Tamu peng chung an rianṭuanṭi hawi tong ding in an kal i Kanan Gate an lonh hnu ah NUG kuttang hriamtlai phu nih an hnulei in an kah hna ruang ah Salai Bawi Bawi a nunnak a liam, tiah ṭuanvo ngeitu nih an chim, crd- The Chin Post.

Thawng dang relchap- Meelaungchaung Khua Um SAC Sakhan Luhhnawh In An Kah, Ralhrang 6 An Thi I Meithal Zuun 3 An Laak, Tanintharyi ramṭhen, Palaw peng, Meelaungchaung khua ah umhmun khuarmi SAC ralhrang sakhan cu luhhnawh in an kah caah ralhrang 6 an thi pinah meithal zuun 3 an laak, tiah Myeik pengkomh battalion 1 chungin ṭuanvo ngeitu pakhat nih Khit Thit Media ah a chim. January 30, zing suimilam 5:30 tluk ah Palaw peng, Meelaungchaung khua ah umhmun khuarmi Pyusawhti le SAC ralhrang hna sakhan cu (KNDO), (PRDF) le ṭangṭi phufonh dang hna nih luhhnawh in an kah hna, tiah theih a si.

Kahdohnak a dih hnu zing suimilam 8:00 tluk ah SAC ralhrang sakhan cu mei in an khangh piak hna caah Pyusawhti le SAC ralhrang hna cu sakhan chuahtaak in hmundang ah an zaam, tiah kan theih. Cu hnu tlawmpal 8:30 tluk ah SAC ralhrang thazaang chap dingin Myeik khuapi lei ah rak chuakmi ralhrang cu Meelaungchaung khua ah an lut i, Mi-2 helicopter in mipi ralkap hna umnak hmun cu hriamngan in a kah caah mipi ralkap chungin hliamtuarmi an um.

Kahdohnak hmun ah SAC ralhrang 6 an thi, Meithal zuun 3 an laak, zing suimilam 10:00 tluk ah kahdohnak hmun in mipi ralkap hnu an kir, tiah theih a si. Kahdohnak ah aa telmi mipi ralkap phufonh hna cu Palaw PDF, Myeik pengkomh battalion 2, KND0 le PRDF ṭangṭi phufonh dang hna ansi, tiah Khit Thit Media nih alanghter. Thawng dang relchap- French Ram Ah Duhlonak Langhter In Lam A Zawhmi Lo Ngeitu Hna Minung 100 Tluk An Tlaih Hna.

French ram, Paris khuapi rawldawr pakhat hmai ah duhlonak langhter in lam zawhmi Lo-Ngeitu hna minung 100 tluk cu ṭuanvo ngeitu hna nih an tlaihkhih hna tiah theih a si. Billion 12 caah din-ei phawtzamhnak hmun a si mi Ramgi ah a bu in Lo-Ngeitu hna duhlonak langhter mi hi kan cohlan piak kho hna lo, tiah ṭuanvo ngeitu hna nih an chim. Ṭuanvo ngeitu palik hna nih duhlonak langhter in lam a zawhmi Lo-Ngeitu minung 91 an tlaih cang hnanak kong an chim.

Lo Ngeitu tu hna nih an duh mi cu lo chungin a chuakmi thlaithar tam deuh in zuar khawhnak ding le supermarket ah din-ei kuat tawnmi cu ngolter ding in an i zuam. Lo ngeitu hna hi ṭuanvo ngeitu palik an phak hlan ah chawdawr kip ah kal in buainak zeimawzat an siamhnawh hna. Cu lak ah minung 18 hna cu motor lampi an kham hram hram caah palik nih traffic law phunglam ning in an tlaih hna, tiah theih a si.

Leave a Comment

Leave a Reply

Your email address will not be published. Required fields are marked *